Abafana bipimishije Covid-19 kureba imikino y’amajonjora yo gushaka itike ya Afrobasket 2021 iri kubera muri Kigali Arena.

Minisiteri ya Siporo ku bufatanye n’Ikigo cy’Igihugu cy’Ubuzima (RBC) n’Ishyirahamwe Nyarwanda ry’Umukino wa Basketball (FERWABA) byemereye bamwe mu bafana bipimishije Covid-19 kureba imikino y’amajonjora yo gushaka itike ya Afrobasket 2021 iri kubera muri Kigali Arena.

Iyi mikino yatangiye ku wa Gatatu tariki ya 25 Gicurasi, izasozwa ku Cyumweru tariki ya 29 Ugushyingo, aho yahuje ibihugu 12 birimo n’u Rwanda.

Itangazo Minisiteri ya Siporo yashyize ahagaragara mu ijoro ryakeye rivuga ko “Amatike azajya agurirwa ku rubuga rwa internet rwa pmg.rw cyangwa kuri *730# ku bakoresha telefoni zisanzwe.”

“Mu rwego rwo kwirinda, ni ngombwa kwipimisha icyorezo cya COVID-19 mbere yo kugura itike. Abantu bose bagura amatike basabwa kuba bafite kode y’icyemezo kigaragaza ko batarwaye COVID-19 ku bipimo bafashwe hagati y’amasaha 24 na 48 mbere yo gukura itike.”

Rikomeza rivuga ko uretse kugaragaza kode y’icyemezo cy’uko umuntu wifuza gukurikira iyi mikino yapimwe COVID-19, azaba asabwa kandi kwishyura 5000 Frw kuri buri mukino uretse ku bantu 50 bazajya bagura mbere, bo bazajya bahabwa amatike y’ubuntu.

Abaguze amatike bazajya bahabwa ubutumwa bugufi bugaragaza ko bemerewe ndetse n’ubutumwa bwa e-mail bukubiyemo ibirebana n’itike baguze, bakazajya babwerekana kuri Kigali Arena.

Mu gihe Kigali Arena yakira abantu ibihumbi 10 bicaye neza, Minisiteri ya Siporo ntiyigeze itangaza umubare ntarengwa w’abemerewe kugura itike, gusa yavuze ko “Amatike azagurishwa abaze kubera ingamba zo gusiga intera hagati y’umuntu n’undi mu rwego rwo kwirinda COVID-19.”

Ikipe y’u Rwanda yatangiye itsindwa na Mali

Ku wa Kane tariki 26 Ugushyingo 2020 nibwo hakinwe imikino y’umunsi wa kabiri w’irushanwa ryo gushaka itike y’imikino y’Afurika “Afrobasket 2021” mu gihe umunsi wa mbere wakinwe ku wa Gatatu.

Ikipe y’u Rwanda iri mu itsinda D yatsinzwe na Mali amanota 70-64.

Mali yatsinze agace ka mbere ku manota 21-14, ikipe y’u Rwanda itsinda agace ka kabiri ku manota 22-17 inatsinda agace ka gatatu ku manota 17-13, gusa Mali ikuramo amanota yose ndetse ishyiramo ikinyuranyo mu gace ka nyuma yatsinze ku manota 19-11.

Nianta Diarra wa Mali yatsinze amanota 23 muri uyu mukino mu gihe Kenneth Gasana na Ndizeye Ndayisaba Dieudonné b’u Rwanda, bombi batsinze amanota 17.

Undi mukino wabaye mu itsinda ry’u Rwanda, warangiye Nigeria itsinze Sudani y’Epfo amanota 76-56 (22-17, 24-12, 15-20 na 15-7).

Mu itsinda B, ikipe ya Angola n’iya Sénégal zongeye kwitwara neza zitsinda umukino wa kabiri. Angola yatsinze Kenya amanota 83- 66 naho ikipe ya Sénégal itsinda Mozambique amanota 60 -53.

Kugeza ubu Angola iyoboye n’amanota ane inganya na Sénégal mu gihe ku mwanya wa gatatu n’uwa kane hari Mozambique zombi zifite amanota abiri.

Imikino y’umunsi wa gatatu irakomeza kuri uyu wa Gatanu, aho mu itsinda A, ikipe y’igihugu ya Tunisia ifite igikombe giheruka muri 2017 ikina umukino wa mbere na Madagascar (11h00) naho ikipe ya Central Africa Republic ikine na RDC (14h00).

Mu itsinda B barasoza imikino yabo, ikipe ya Mozambique igomba gukina na Kenya (17h00) naho Sénégal igakina na Angola (20h00). Aha ni ho hagomba kumenyekana uko amakipe amakipe atatu ya mbere akurikiranye.

Tanga Igitekerezo ukoresheje Facebook

SHARE