Abagize komite nyobozi bose b’ikipe ya Rayon Sports bahagaritswe

Inama y’Ubuyobozi y’Umuryango wa Rayon Sports yatangaje ko yafashe umwanzuro wo guhagarika komite yose yayoboraga igikorwa cy’umuryango (Rayon Sports FC)

Mu itangazo ryashyizweho umukono n’Umuyobozi w’Umuryango, Ngarambe Charles, rivuga ko nyuma yo gusuzuma imiyoborere ya komite iriho, yasanze ari ngombwa guhagarika abagize iyi komite kuko birengagije amategeko agenga umuryango.

Munyakazi Sadate yandikiye Perezida wa Repubulika y’u Rwanda amusaba kurenganurwa no kwishinganisha kuko abona hari abashaka kumuhirika ku buyobozi bakigarurira ikipe.

Inama y’Ubuyobozi yaashyizeho kandi yemeza abagomba kuba bayoboye ikipe ya Rayon Sports kugeza igihe amatora azabera.

Abagize iyi komite igiye kuba iyobora Rayon Sports ni Ngarambe Charles, Muvunyi Paul, Dr. Rwagacondo Claude, Ntampaka Theogene, Gacinya Chance Denis, Muhirwa Prosper na Ruhamyambuga Paul.

Ibi kandi bije mu gihe Perezida wa Rayon Sports, Munyakazi Sadate yandikiye Perezida wa Repubulika y’u Rwanda amusaba kurenganurwa no kwishinganisha kuko abona hari abashaka kumuhirika ku buyobozi bakigarurira ikipe.

Ikipe ya Rayon Sports imaze igihe ivugwamo ibibazo bishingiye ku mikoro, byasembuwe no guhagarika amasezerano y’abakinnyi bose kubera ikibazo cya COVID-19 yabaye intandaro yo guhagarika Shampiyona y’u Rwanda, bigatuma amakipe yari atunzwe ahanini n’amafaranga ava kuri sitade ahura n’ihungabana ry’ubukungu.

Munyakazi Sadate yatorewe kuyobora ikipe ya Rayon Sports, tariki 14 Nyakanga 2019 mu nteko rusange yabereye mu karere ka Bugesera mu murenge wa Nyamata mu kigo cy’imikino cya Nyamata basanzwe bita ’Tuza Inn’. Yari asimbuye Paul Muvunyi wari umaze imyaka ibiri ayobora Rayon Sports.

Gusa tariki 9 Gicurasi 2020, Munyakazi Sadate yahagaritswe amezi atandatu mu bikorwa by’umupira w’amaguru bitewe n’amagambo yatangaje nyuma y’uko Rayon Sports ititabiriye Igikombe cy’Ubutwari 2020 mu ntangiriro z’uyu mwaka. Ni icyemezo yamaze kukijuririra.

Tanga Igitekerezo ukoresheje Facebook

SHARE