Abaguze amatike yo kwinjira mu gitaramo ‘Each One Reach One’ batangiye gusubizwa amafaranga

Mu mpera z’icyumweru gishize nibwo mu mujyi wa Kigali hagombaga kubera igitaramo cyo guhimbaza Imana cyari cyiswe ‘Each One Reach One’ cyateguwe n’umuryango witwa ‘Melody of New Hope’. Kubera ikibazo cya Coronavirus yugarije Isi cyaje guhagarikwa habura amasaha make ngo gitangire, kuri ubu abari baraguze amatike batangiye gusubizwa amafaranga yabo.

Iki gitaramo cyagombaga kubera i Rusororo mu Intare Arena ku itariki ya 8 Werurwe 20202, kigahuriza hamwe abahanzi bakomeye mu ndirimbo zo guhimbaza Imana nka Adrien Misigaro, Gentil Misigaro,Israel Mbonyi n’abandi.

Habura amasaha make ngo iki gitaramo gitangire cyahise gisubikwa mu rwego rwo kubahiriza amabwiriza yashyizweho agamije gukumira icyorezo cya Coronavirus cyugarije Isi.

Mu itangazo ryashyizwe ahagaragara n’umuryango Melody of New Hope (MNH) yari yagiteguye, basabye abari baraguze amatike babyifuza ko batangira gusubizwa amafaranga yabo guhera kuri uyu wa 12 Werurwe kugeza kuwa 16 Werurwe 2020.

Bagize bati “Abifuza gusubizwa amafaranga baza ku biro bya Ishema Ticket Kimironko muri Promise House hejuru ya KCB mu igorofa rya kabiri umuryango wa 5, bakaza bitwaje n’amatike bari baguze.”

Icyakora ngo abifuza gushyigikira ibikorwa bitandukanye bya Melody of New Hope yayatanga nk’inkunga.

Nyuma y’uko iki gitaramo gisubitswe Adrien Misigaro na Gentil Misigaro ari nabo bayoboye MNH, bucyeye bwaho baragiye bakora igitaramo nk’uko n’ubundi bari babiteganyije nta muntu n’umwe uri muri sale ahubwo bagicisha live ku rubuga rwa Youtube.

Baje kubwira itangazamakuru ko babikoze ku bw’abakunzi babo ariko banabasaba inkunga yo kugirango bazibe icyuho cya miliyoni 15 bahombejwe n’isubikwa ry’iki gitaramo.

Itangazo Melody of New Hope yasohoye ryo gusubiza amafaranga abari baraguze amatike y’igitaramo cyabo.
Iki gitaramo cyahagaritswe habura amasaha make ngo gitangire.
Iki gitaramo cyasubitswe habura amasaha make ngo gitangire nyuma bazakugikora nta muntu n’umwe uri muri sale.
Nubwo baririmbiraga intebe bakoresheje imbaraga nk’izo barigukoresha huzuyemo abantu.

 

Tanga Igitekerezo ukoresheje Facebook

SHARE