Abahanzi bazafasha Social Mula mu kumurika album ye ya mbere ‘Ma vie’ bamenyekanye

Mugwaneza Lambert  wamamaye mu muziki nka Social Mula ni umwe mu bahanga u Rwanda rufite muri muzika, kuri ubu ageze kure imyiteguro y’igitaramo gikomeye azamurikiramo album ye ya mbere yise ‘Ma vie’. Muri iki gitaramo yatumiyemo abandi bahanzi nabo bafite amazina akomeye barimo King James, Bruce Melodie, Buravan, Big Fizzo.

Social Mula umaze imyaka isaga irindwi yarigaruriye imitima ya benshi mu bakunzi ba muzika Nyarwanda, azamurika album ye ya mbere mu gitaramo kizaba tariki 23 Ugushyingo 2019 muri Camp Kigali.

Iyi album Social Mula yitiriye imwe mu ndirimbo ze ya kunzwe cyane ‘Ma Vie’ izaba iriho indirimbo zinyuranye ziri mu njyana ya Afrobeat na R&B ari nazo akunze kwibandaho cyane, higanjemo izisanzwe zizwi ndetse n’izindi zitarajya hanze.

Mu minsi ishize uyu musore yashyizwe mu cyiciro cya nyuma cy’abahanzi icumi bari guhatanira igihembo cya Prix Découvertes RFI 2019.

Muri iki gitaramo Social Mula yatumiyemo abandi bahanzi b’ibyamamare bazamufasha barimo King James, Bruce Melodie, Buravan bari imbere mu bakora injyana ya R&B mu Rwanda, Yverry na Marina. Yanatumiye kandi Big Fizzo ukomoka i Burundi.

Kwinjira muri iki gitaramo bizaba ari amafaranga ibihumbi bitanu mu myanya isanzwe (5000 Frw), ibihumbi icumi (10 000 Frw) mu myanya y’icyubahiro, n’ibihumbi ijana na mirongo itanu (150 000 Frw) ku meza azicaraho abantu umunani mu myanya y’icyubahiro.

Big Fizzo azafasha Social Mula mu gitaramo cyo kumurika album ye ya mbere.
King James utari uherutse kwigaragaza mu bitaramo nawe yatumiwe na Social Mula.

 

Tanga Igitekerezo ukoresheje Facebook

SHARE