Abandi bantu 11 bakize Coronavirus mu Rwanda, hasigara abarwaye 100

Kuri uyu wa Gatandatu abandi bantu 11 bari bamaze igihe barwaye Coronavirus basezerewe mu bitaro nk’uko byatangajwe na Minisiteri y’Ubuzima.

Mu Rwanda hamaze kugaragara abantu bagera ki 118 banduye Coronavirus, barindwi muri aba basezerewe mu bitaro ku cyumweru gishize nyuma yo gukorerwa isuzumwa bagasanga nta virus ikigaragara mu maraso yabo. Kuri uyu wa Gatandatu nabwo harasezererwa abandi 11 , bose hamwe bakaba 18 bamaze gusezererwa hagasigara abandi 100 bakirwaye.

Minisitiri w’Ubuzima Dr Ngamije Daniel mu kiganiro yakoranye na kuri Televiziyo Rwanda kuri uyu wa Gatandatu, yatangaje ko abantu 11 bari bamaze igihe barwaye barimo gusezererwa mu bitaro bari barwariyemo.

Yagize ati “Mu bantu bose tumaze gusuzuma, abantu 118 bagaragayeho ubu burwayi kugeza uyu munsi wa none. Muri bo tumaze gusezerera barindwi, twasezereye barindwi ku cyumweru gishize, ndetse uyu munsi wa none turateganya gusezerera abantu 11, nibaza ko ubu muri aya amasaha ababishinzwe barimo kubikora.”

Minisitiri Dr Ngamije yavuze ko kugeza uyu munsi Minisiteri y’Ubuzima imaze gusuzuma abantu ibihumbi umunani birengaho gato, ariko kubera ko hari nk’abagiye basuzumwa inshuro zirenze imwe bitewe n’impamvu, ku buryo ibipimo byose hamwe byafashwe birenga ibihumbi 11.

Minisitiri Ngamije yakomeje avuga ko mu barwaye bose nta n’umwe wari wagera ku rwego rwo kuremba, Ati  “Kugeza uyu munsi wa none turacyafite amahirwe, nta n’umwe wari wajya aho tuvurira indembe nubwo hateganyijwe.”

Minisitiri Ngamije yavuze ko kugeza ubu kuba hakigaragara abantu batandukanye batahurwaho iyi ndwara, abantu bagomba gukomeza gukurikiza ingamba zirimo gufunga ingendo n’ibindi bikorwa bihuriza hamwe abantu benshi.

Ikigo cya Kanyinya ni kimwe mu bivurirwamo abantu banduye Coronavirus.

Tanga Igitekerezo ukoresheje Facebook

SHARE