Abandi bantu 7 basanganywe Coronavirus, bose bahita bagera kuri 82

Kuri uyu wa Gatatu tariki 1 Mata 2020 mu Rwanda habonetse abandi bantu 7 banduye icyorezo cya Coronavirus, umubare wabamaze kucyandura uhita ugera kuri 82.

Itangazo rya Minisiteri y’Ubuzima  rivuga ko aba bantu bashya bagaragayeho iyo virusi barimo umuntu umwe waje aturutse i Dubai, umuntu umwe waje aturutse mu Bwongereza, abantu babiri baherutse kugirira ingendo mu bihugu byo mu karere, hamwe n’abandi batatu batahuwe ko bahuye n’abandi barwaye Coronavirus mu Rwanda.

Minisiteri y’Ubuzima iravuga ko abo barwayi bose bahise bashyirwa mu kato, kandi hakaba hashakishijwe abantu bose bahuye na bo kugira ngo na bo basuzumwe ndetse bitabweho n’inzego z’ubuzima.

Iyi minsiteri kandi isaba Abaturarwanda bose gukomeza kwitwararika, bakurikiza ingamba zafashwe na Leta y’u Rwanda. Ivuga ko abantu bose bageze mu Rwanda mu byumweru bibiri bazashyirwa mu kato mu gihe cy’iminsi 14, uhereye igihe bagereye mu Rwanda.

 

Tanga Igitekerezo ukoresheje Facebook

SHARE