Abandi bantu babiri basanzwemo Coronavirus mu Rwanda, abayirwaye bahita bagera kuri barindwi

Abandi bantu babiri basanzwemo icyorezo cya Coronavirus mu Rwanda, umubare w’abayirwaye uhita ugera kuri barindwi.

Mu itangazo Minisiteri y’Ubuzima yashyize hanze kuri uyu wa Mbere tariki ya 16 Werurwe 2020 rivuga ko habonetse abandi barwayi babiri bagaragaweho Coronavirus mu Rwanda.

Aba bantu babiri bagaragaweho iki cyorezo barimo Umunyarwandakazi w’imyaka 32 washakanye n’Umunyarwanda na we wanduye uheruka mu Birwa bya Fiji anyuze muri Amerika na Qatar.

Undi n’umugabo w’Umudage w’imyaka 61 wageze mu Rwanda ku itariki 13 Werurwe aturutse mu Budage anyuze ku Kibuga cy’Indege cya Istanbul muri Turukiya kandi utari wagaragaje ibimenyetso. Yaje kugira inkorora maze agana kwa muganga ku itariki 15 Werurwe 2020.

Iyi Minisiteri ivuga ko aba barwayi kimwe n’abandi bari kuvurirwa ahabugenewe hashakishwa abandi bahuye na bo kugira ngo nabo basuzumwe kandi bitabweho n’inzego z’ubuzima.

Kugeza ubu imibare yashyizwe hanze n’Ishami ry’Umuryango w’Abibumbye rishinzwe ubuzima (OMS), igaragaza ko abamaze kwandura iki cyorezo ku Isi hose barenga ibihumbi 160 muri bo abarenga ibihumbi 77 barayikize, yica abarenga ibihumbi 7 mu gihe abandi bakirwaye.

Muri Africa u Rwanda ruri ku mwanya wa gatatu mu bafite abarwaye Coronavirus benshi nyuma ya Africa y’Epfo ifite 61 na Senegal ifite 24.

Abandi barwayi babiri bagaragaweho icyorezo cya Coronavirus, umubare w’abayirwaye mu Rwanda ugera kuri barindwi.

 

Tanga Igitekerezo ukoresheje Facebook

SHARE