Abanduye coronavirus mu Rwanda biyongereye bageze kuri 11,harimo uwayanduye adaheruka kujya mu mahanga, Ingendo z’indege zahagaritswe

Minisiteri y’ubuzima mu Rwanda imaze gutangaza ko hagaragaye abandi bantu batatu banduye covid-19, muri bo harimo uwayanduye adaheruka kujya mu mahanga.

Umubare w’abamaze kurwara iyi ndwara mu Rwanda wavuye ku munani ugera kuri 11 nk’uko minisiteri y’ubuzima ibivuga.

 

Aba batatu ni umuhindekazi w’imyaka 37 uheruka kuva i Mumbai tariki 08/03/2020, uyu akaba yarashakanye n’umuhinde bayisanzemo bwa mbere mu Rwanda.

Abandi ni abagabo babiri b’abanyarwanda, umwe aheruka kuva mu Bubiligi tariki 16/03 aciye i Addis Ababa naho undi ni umusore w’imyaka 26 udaheruka mu mahanga.

mu kurushaho kwirinda ikwirakwira rya koronavirusi hahagaritswe ingendo z’indege ziva cyangwa zijya mu Rwanda

Itangazo rya minisiteri y’ubuzima mu Rwanda rivuga ko “mu kurushaho kwirinda ikwirakwira rya koronavirusi hahagaritswe ingendo z’indege ziva cyangwa zijya mu Rwanda, harimo n’iza Rwandair, zinyuze ku kibuga mpuzamahanga cya Kigali”.

Minisiteri y’ubuzima ivuga ko ibi bizatangira kubahirizwa guhera tariki 20 z’uku kwezi saa sita z’ijoro.

Kompanyi z’indege nka Brussels Airlines, KLM, Qatar Airways, Ethiopian Airways n’izindi zisanzwe zigwa mu Rwanda buri munsi.

Brussels Airlines yari iherutse gutangaza ko yasubitse ingendo zayo mu kwirinda ikwirakwira ry’iyi ndwara.

Bigaragara ko covid-19 iri gukwirakwira ahanini bivuye ku ngendo z’abantu ku isi, ibi byatumye ibihugu bimwe na bimwe cyane iby’iburayi bifunga imipaka yabyo.

Muri Afurika iyi virus imaze kugera mu bihugu birenga 30, mu karere ka Afurika y’iburasirazuba u Rwanda nirwo rufite umubare munini w’abamaze kumenyekana ko banduye covid-19.

Umubare w’abamaze kurwara iyi ndwara mu Rwanda wavuye ku munani ugera kuri 11 nk’uko minisiteri y’ubuzima ibivuga.

Tanga Igitekerezo ukoresheje Facebook

SHARE