Abantu babiri bishwe na coronavirus, abamaze guhitanwa n’iki cyorezo bamaze kuba 10 mu Rwanda

Abantu babiri bishwe na COVID-19 kuri uyu wa Kabiri bituma umubare w’abamaze guhitanwa n’iki cyorezo giterwa n’agakoko gashya ka Coronavirus mu Rwanda baba 10.

Ni ku nshuro ya mbere kuva umurwayi wa mbere wa Coronavirus agaragaye mu Rwanda ku wa 14 Werurwe 2020, hatangajwe abantu babiri bitabye Imana mu munsi umwe.

Itangazo rya Minisiteri y’Ubuzima ryo kuri uyu wa 18 Kanama 2020 ryerekana ko babiri bitabye Imana ariko ntihatangajwe aho bavurirwaga cyangwa aho batuye.

Rikomeza rigira riti ‘‘Twihanganishije imiryango y’Abanyarwanda babiri b’imyaka 45 na 55 bitabye Imana.’’

Minisante kandi mu masaha 24 yashize mu bipimo 4326 yafashe yasanze abantu 37 banduye Coronavirus.

Abarwayi bashya bagaragaye muri Kigali ahakuwe 28 mu bahuye n’abanduye n’abapimwe mu bibasiwe kurusha abandi, i Rusizi habonetse batandatu, mu gihe mu Turere twa Rwamagana, Rubavu na Huye buri hose habonetse umwe.

Abantu 22 ni bo bakize bituma umubare w’abamaze gusezererwa mu bitaro uba 1683.

Kuva umurwayi wa mbere wa COVID-19 agaragaye mu Rwanda ku wa 14 Werurwe 2020, hamaze kuboneka abantu 2577 banduye mu bipimo 342 614 bimaze gufatwa, 1683 barayikize mu gihe 884 bakiri mu bitaro naho icumi bitabye Imana.

Kugeza ubu nta muti n’urukingo bya Coronavirus biraboneka, hakoreshwa uburyo bwo kuvura ibimenyetso by’iki cyorezo gusa, kugeza umubiri w’umuntu wubatse ubudahangarwa, virus igashira ityo mu maraso.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

Tanga Igitekerezo ukoresheje Facebook

SHARE