Abarwaye Coronavirus mu Rwanda biyongereyeho 6, bose hamwe baba 17, abinjiye mu Rwanda vuba basabwe kwishyira mu kato

Itangazo rya Minisiteri y’Ubuzima ryo ku mugoroba wo kuri uyu wa Gatanu, tariki ya 20 Werurwe 2020, rigaragaza ko hari abandi bantu batandatu bagaragaweho Coronavirus, abayirwaye ku butaka bw’u Rwanda bakaba bahise bagera kuri 17.

Iritangazo rivuga ko aba batandatu babonetse kuri uyu munsi barimo umugore w’Umufaransakazi w’imyaka 30 hamwe n’umwana we w’amezi 10. Uwo basahakanye akaba ari mu bagaragayeho Coronavirus mu minsi ishize.

Umunyarwanda w’imyaka 32 waje aturuka i Dubai ku itariki ya 19 Werurwe ibimenyetso bye byagaraye agipimwa ku kibuga cy’indege.

Barimo kandi umugabo w’Umunya- Suède w’imyaka 26 waje aturuka muri Suède ku itariki ya 3 Werurwe. Umugabo w’Umunyarwanda w’imyaka 32 usanzwe akorera ingendo mu mahanga wagaragaje ibimenyetso ku itariki ya 18 werurwe. Umugabo w’Umunyarwanda w’imyaka 24 wageze mu Rwanda ku itariki 19 Werurwe avuye mu Buhinde anyuze i Doha muri Qatar.’’

Kuri ubu abarwayi bose bari kuvurirwa ahabugenewe ari nako hashakishwa abantu bose bahuye nabo kugira ngo basuzumwe kandi bitabweho n’abaganga.

Iyi Minisiteri yasabye abantu bose bageze mu Rwanda mu byumweru bibiri bishize kwishyira mu kato mu gihe cy’iminsi 14 guhera igihe bagereye mu Rwanda, hakurikizwa amabwiriza y’inzego z’ubuzima.

Itangazo rya Minisiteri y’Ubuzima rivuga kuri raporo y’umunsi kuri Coronavirus.

 

 

Tanga Igitekerezo ukoresheje Facebook

SHARE