Abasore 2 bagaragaye muri video bambura bakanakubita umugore ucuruza mituyu, umwe yafashwe undi araraswa ahita apfa

Polisi y’Igihugu yatangaje ko abasore babiri bagaragaye ku mashusho bakubita umucuruzi wa Mobile Money bakanamwambura, bafashwe umwe akaraswa agapfa ubwo yarwanyaga inzego z’umutekano.

Polisi yatangaje ko ku bufatanye n’Urwego rw’ubugenzacyaha (RIB), ‘twataye muri yombi Irakoze Emmanuel naho mugenzi we Irumva Elias yarashwe arapfa ubwo yarwanyaga inzego z’umutekano igihe yafatwaga’.

Uyu w’imbere ni we wafashwe

Aba bombi bakubise ndetse bambura Tuyisenge Jeannette, i Remera ku wa 23 Gashyantare 2020.

Ku itariki 25 Gashyantare 2020 nibwo hatangiye gukwirakwira amashusho yafashwe na Camera zicunga umutekano, agaragaza umukobwa wambaye umwambaro w’akazi uranga aba-agent ba MTN, akubitwa n’abasore babiri mu buryo bukomeye, bamwambura amafaranga yari afite.

Ayo mashusho bigaragara ko yafashwe ku itariki ya 23 Gashyantare 2020 ahagana saa 17:20 agaragaza ko abasore babiri bayoboye uwo mukobwa ahantu hatari abantu babigambiriye cyangwa bakamutegera ahantu yari agiye kwinjira, ariko batazi ko hari Camera zicunga umutekano.

Umusore umwe yaramufashe aramuniga, undi atangira kumukubita amusaka, amwambura ibyo afite bigaragara ko ashakamo amafaranga kugeza ubwo bamusize aho ari intere.

Ayo mashusho yagaragaye cyane ku mbuga nkoranyambaga yerekana abasore babiri, bagotera umukobwa inyuma y’amazu ari i Remera

Polisi y’u Rwanda yatangaje ko nyuma yo kubona aya mashusho yahise itangira ibikorwa byo gushakisha aba bagizi ba nabi.

Umuvugizi wa Polisi y’u Rwanda Commissioner of Police (CP) Kabera Jean Bosco yavuze uyu munsi ari bwo bafashe umwe muri aba basore witwa Irakoze Emmanuel mu gihe mugenzi we yarashwe bikamuviramo gupfa ubwo yageragezaga kurwanya inzego z’umutekano.

Ati “Uyu munsi rero mu gitondo cya kare hakaba hafashwe umwe Irakoze Emmanuel, hanyuma twakomeje gukurikirana amakuru undi nawe mu ma saa saba ubwo bajyaga kumufata muri Nyarugenge i Nyamirambo ubwo yarwanyaga inzego z’umutekano ziramurasa”.

Irakoze afungiwe kuri sitasiyo ya Polisi i Remera mu gihe, uwarashwe we umurambo we wajyanywe ku Kacyiru mu buruhukiro.

Uyu musore wafashwe Irakoze avuga ko iki gitekerezo cyo kwiba cyazanywe na mugenzi we ubwo bari bavuye mu kabari gaherereye mu Migina, maze nawe kubera inzoga yari yanyweye abyemera atazuyaje

Ati “Twari turi kunywera mu Migina tumaze kunywa ndamubwira wanjye nti nditahiye ati nanjye reka nze twitahire njye nta gahunda nari mfite yo kwiba uriya muntu ahubwo twageze imbere wagira ngo yari asanzwe anamuzi ahita amunyereka ngo reba uriya mu agent, yari amanutse ahantu mu kabari kubera n’inzoga twari tumaze kunywa nanjye sinigeze mbitekerezaho ngo mvuge ngo ni ku manywa n’abantu bari kutureba ahubwo twahise tumanuka tuba turamufashe.”

hafashwe umwe Irakoze Emmanuel, Uyu agaragara aniga umugore nyuma akamukandagira ku gahanga

Irakoze kuri ubu uri mu maboko ya polisi yemeye ko ubwo bahohoteraga uyu mukobwa bamwatse amafaranga y’u Rwanda ibihumbi 24 na telefone ebyiri nto.

Umuvugizi w’urwego rw’igihugu rw’ubugenzacyaha RIB Marie Michelle Umuhoza yavuze ko ku byaha uyu musore yakurikiranwagaho hiyongeyeho n’icy’ibiyobyabwenge kuko ubwo inzego z’umutekano zajyaga kumufata zasanze iwe urumogi.

Ati “Agiye gukurikiranwaho icyaha cyo gukubita no gukomeretsa ndetse n’icyaha cy’ibiyobyabwenge kuko mu gihe yafatwagwa yafatanywe n’urumogi”.

Umuhoza yasabye abanyarwanda n’abaturarwanda kumenya ibyaha, kubyirinda no kubirinda abandi ndetse haba hari n’aho bigaragaye bagatanga amakuru kare kugira ngo ababigizemo uruhare bashobore gushyikirizwa inzego z’ubutabera.

Urwego rw’igihugu rw’ubugenzacyaha rwavuze ko uyu musore agiye gukorerwa dosiye hanyuma azashyikirizwa urwego rw’ubushinjacyaha kugira ngo azagezwe imbere y’ubutabera.

Tanga Igitekerezo ukoresheje Facebook

SHARE