Abategura Miss Rwanda banze guhemba Miss Nishimwe Naomi, umushara w’arenga miliyoni 9 yagombaga guhabwa nk’ufite ikamba rya Miss Rwanda 2020

Miss Rwanda 2020 Nishimwe Naomie ntabwo yigeze ahembwa amafaranga ibihumbi 800 ku kwezi yari yemerewe nyuma yo kwegukana ikamba bitewe n’uko yaseshe amasezerano na Rwanda Inspiration Back Up itegura iri rushanwa.

Muri Werurwe 2020 nibwo Nyampinga w’u Rwanda 2020,Nishimwe Naomie, yatangaje ko atazakorana na Rwanda Inspiration Back Up, ikigo gisanzwe gitegura irushanwa rya Nyampinga w’u Rwanda.

Nishimwe Naomie

Nishimwe Naomie yari akoze ibitamenyerewe kuko abandi bakobwa bamubanjirije kwambara ikamba bo bakomezaga gukorana na Rwanda Inspiration Back Up mu gushyira mu ikorwa imishinga yabo.

Mu Kiganiro n’abanyamakuru cyavugaga ku myiteguro y’irushanwa rya Miss Rwanda 2021, abategura irushanwa babajijwe ibibazo bitandukanye ku cyatumye Nishimwe Naomie adakorana na bo, Umuvugizi wa Miss Rwanda Nimwiza Meghan  avuga  ko ari amahitamo ye kandi nta kibazo kirimo.

Ati “Kuba hari amasezerano ataragenze neza nk’uko byari byateganyijwe ni ibintu bisanzwe nta tegeko ryari ririho rivuga ko nyampinga agomba gukorera Rwanda Inspiration Back Up, rero kuba atarayikoreye nta gikuba cyacitse. Yahisemo gufata inzira ze kuko yabonaga ari byo bimwungukira. Kandi tubiha agaciro.”

Mu byo Nishimwe Naomie yari yemerewe nk’ibihembo harimo n’umushahara w’amafaranga ibihumbi 800 buri kwezi, gusa ntabwo yigeze abona n’igiceri cy’amafaranga 100.

Ni ukuvuga ko uku kudasinya amasezerano kwatumye Nishimwe Naomie ahomba amafaranga agera kuri miliyoni icyenda n’ibihumbi 600.

Nimwiza Meghan yasobanuye ko impamvu Miss Rwanda 2020 atahawe umushahara yari yemerewe ngo ni uko atigeze akorera ikigo cya Rwanda African Improved Food cyagombaga kujya kimuhemba.

Ati “Ibihembo birimo imodoka, kujya muri Salon n’ibindi yarabihawe ariko atakoranye na kampani yagombaga gukorana nayo agakorera indi kampani twizeye ko ubwo imuhemba ariko ntabwo AIF izamuhemba umushahara. Ntabwo ushobora guhemba umukozi utakoze.”

Ubuyobozi bwa Africa Improved Food nabwo bwemeje ko butari guhemba Nishimwe Naomie kandi nta kazi na kamwe yigeze abakorera.

Ntabwo bigeze basobanura icyatumye Nishimwe Naomie adakomeza gukorana na Rwanda Improved Food nk’uko byari bimeze dore ko iki kigo nta n’aho gihuriye na Rwanda Inspiration Back Up.

Mu Mategeko n’amabwiriza bigomba gukurikizwa muri uyu mwaka harimo ingingo ivuga ko Miss Rwanda 2020, ibisonga n’abandi bazatsindira imyanya itandukanye bazasinya amasezerano y’imikoranire n’abategura irushana rya Miss Rwanda bivuze ko iki kibazo kidashobora kongera kubaho.

Tanga Igitekerezo ukoresheje Facebook

SHARE