“Abigunze n’abafite agahinda baze kwa Yesu Ariho niwe wo kwizerwa” Nice Usanase

Usanase Nice n’umukobwa w’umuhanzikazi ukora ivugabutumwa abinyujije mu ndirimbo zo kuramya no guhimbaza Imana,n’umukristo mw’Itorero rya ADEPR asaba abantu kwita ku by’ijuru kuruta iby’isi bakisunga Yesu Kristo kuko Ariho.

Nice Usanase umuhanga mu kuyobora ijwi no gutondekanya amagambo abatura benshi amaze gukora umuzingo w’indirimbo yise “Igitondo cy’imigisha” yamuritse ku mugaragaro n’izindi ndirimbo 2 zirimo iyitwa “Ariho” na “Nzakenyuruza Umwami“.

Nta washidikanya ko uyu muhanzikazi ari mu bakunzwe muri iyi minsi mu muziki wo kuramya no guhimbaza Imana kuko bishimangirwa n’ibitaramo agenda yitabira hirya no hino mu Gihugu aho atumirwa cyane.

Ari mubahanzikazi bishimirwa bikomeye mu bitaramo atumirwamo hirya no hinomu Gihugu

Ku ndirimbo yise ” Ariho” Usanase asobanura ko yayihimbye agamije gukomeza abantu bakunda kuba mugahinda k’ibibazo byabo, bakihebeshwa n’amaganya.

“Bamwe bishora mu biyobya bwenge kubwo kumva ko babuze ubahumuriza bitewe n’ubuzima bw’imiryango yabo cyangwa kuko bumva ko Imana bakoreye itabaho bitewe n’amagambo bumvishe bityo rero njye nza mbahamiriza neza ko rwose Yesu ariho kandi ariwe wenyine wo kwizerwa ndetse n’umujyanama mwiza bityo rero ntibakongere kwiheba ukundi cyangwa kwigunga ukundi ahubwo baze kwa Yesu kuko ashoboye kubahumuriza ndetse akanabahindurira amateka kuko Ariho”

Nice Usanase asanga abantu bakwiriye kurangamira iby’ijuru kuruta iby’isi bishira

Uyu muhanzikazi yahamirije IBYAMAMARE.COM ko umuziki wo kuramya no guhimbaza Imana mu Rwanda umaze kwaguka bitewe n’ubutumwa bwiza baririmba by’umwihariko ubu n’ibitaramo bakoresha bisigaye byitabirwa ku rwego rushimishije.

“Muzika yo kuramya no guhimbaza Imana iragenda izamuka ku rwego rushimishije, abantu bagenda bitabira ibitaramo dutegura bitandukanye na mbere babaga ari bacye n’ubutumwa dutanga urabona ko abantu babwumva kandi hari aho bubakura”

Usanase avuga ko ubutumwa atanga mu ndirimbo aze atajya asiga inyuma urubyiruko aho by’umwihariko arusaba kuba muri Yesu, gukorera Imana rugifite imbaraga, kurangwa n’imico myiza no kwirinda ibyarutandukanya n’Imana birimo ubusinzi, ubusambanyi ndetse n’ibindi bikorwa bibi Imana yanga.akarwibutsa ko Yesu “Ariho

Muri uyu mwaka wa 2020 Nice Usanase avuga ko ari gutegura indirimbo nziza nyinshi mu buryo bw’amajwi ndetse n’amashusho aho atangaza ko Imana nimushoboza mu mpera z’Umwaka azategura igitaramo gikomeye cyane azanatumiramo abandi bahanzi batandukanye.

Mu kiganiro na Ibyamamare yasoje asaba abakunzi be kumusengera no kumushyigikira ku buryo bukomeye no gukunda ibihangano bye no kumukurikira ku mbuga nkoranyambaga ze aho akoresha “NICE USANASE” haba kuri Facebook, Youtube ndetse na Instagram akaba akomeje kubashimira ku bw’urukundo bakomeje kumugaragariza aho abifuriza umugisha uturuka ku Mana ibihe byose.

Umva indirimbo Arihoya Nice Usanase

 

Tanga Igitekerezo ukoresheje Facebook

SHARE