Airtel Rwanda yahaye leta miliyoni 135Frw zo gufasha mu guhangana na Coronavirus

Sosiyete y’Itumanaho Airtel Rwanda, yashyikirije Guverinoma y’u Rwanda inkunga ya miliyoni 135 (135,000,000 RWF), zo kuyishyigikira mu rugamba rwo kurwanya icyorezo cya Coronavirus.

Kuri uyu wa Gatanu tariki ya 1 Gicurasi 2020 nibwo Umuyobozi wa Airtel Rwanda, Amit Chawla, yashyikirije iyi nkunga  Minisitiri w’Ubuzima Dr Ngamije Daniel.

Airtel Rwanda yatangaje ko izirikana ibihe bikomeye abakora mu rwego rw’ubuzima barimo guhura na byo, ari nayo mpamvu yifuje kwifatanya nabo muri uru rugamba rutoroshye rwo kurwanya COVID-19.

Ubwo yatangaga iyi nkunga, umuyobozi mukuri wa Airtel Rwanda, Amit Chawla yagize ati “Uyu munsi, dushimiye uyu mwanya duhawe ngo dutange umusanzu wacu muri urugamba igihugu kirimo rwo kurwanya COVID-19. Iyi nkunga ikaba ari ikimenyetso cy’ishimwe ryacu ku bakozi b’ubuvuzi ku ruhare bakomeje kugira mu ishyirwa mu bikorwa rya gahunda za  guverinoma mu gukumira iki cyorezo cyugarije isi.”

Minisitiri w’Ubuzima Dr Ngamije Daniel, yashimye ubufasha bwatanzwe na Airtel Rwanda, agira ati “Iki ni ikimenyetso cyiza cy’ubufatanye n’ubumuntu bw’abakozi ba Airtel, bizafasha mu gushyigikira gahunda z’igihugu zo kurwanya Covid-19. Tuzakomeza ubufatanye no gukorera hamwe ku bw’inyungu z’abaturage bacu.

Airtel yashyizeho ingamba zitandukanye zigamije gufasha abakiriya bayo kutegerana muri iki gihe cya coronavirus, muri izo ngamba harimo umurongo utishyurwa wa 114 abakiriya bayo bashobora kumenya uburyo bwo kwirinda ndetse n’amakuru kuri COVID-19 bakoresheje uyu murongo.

Yashyizeho uburyo bworohereza abanyeshuri bo mu byiciro byose kwiga bakoresheje iyakure (E-Learning) nta kiguzi cya internet basabwe nka bumwe mu buryo bwo gufasha Abanyarwanda guhangana n’icyorezo cya Coronavirus. Aha ni ku bufatanye n’ikigo cy’igihugu cy’uburezi (REB) n’Inama Nkuru y’Amashuri makuru na Kaminuza, HEC.

Airtel Rwanda kandi yafashije kaminuza eshanu zigenga kwigisha mu buryo bw’ikoranabuhanga, aho abanyeshuri bari ku muyoboro wayo nta kiguzi cya internet basabwa. Izo kaminuza ni INES, UOK, ITAB, CHUR, KP na AUCA.

Iyi sosiyete yongereye igihe cya Poromosiyo ya ’Mukazi kose’ aho abakiliya bohererezanya ndetse bakanakira amafaranga ku buntu. Ibi ni ukwirinda ko abantu begerana no guteza imbere guhererekanya amafaranga mu buryo bw’ikoranabuhanga.

Hari kandi kohererezanya ubutumwa bugufi ku buntu (SMS) mu korohereza imiryango n’inshuti kuganira.

Umuyobozi wa Airtel Rwanda, Amit Chawla avuga ko iyi nkunga ari ukuzirikana umuhate wa leta y’u Rwanda mu kurwanya Coronavirus.
Minisitiri w’Ubuzim.a Dr Daniel Ngamije, yashimye ubufasha bwatanzwe na Airtel Rwanda.

 

Tanga Igitekerezo ukoresheje Facebook

SHARE