Airtel Rwanda yahuje imbaraga na WorldRemit borohereza abakiliya uburyo bwo koherezanya amafaranga mu bice byose by’Isi

Kuri uyu wa Mbere tariki ya 22 Kamena 2020 Sosiyete y’itumanaho ya Airtel Rwanda yatangije ubufatanye na WorldRemit bashyiraho uburyo bworoshye kandi buhendutse bwo gufasha inshuti n’imiryango kohererezanya amafaranga kuri telefono aho baba bari hose ku Isi.

Airtel ikigo cya mbere mu Rwanda gikataje mu bijyanye no gutanga serivisi zo guhamagara, iza interineti n’izikora ibirebana n’amafaranga cyatangije ubufatanye na WorldRemit ikigo gitanga serivisi zo kohererezanya amafaranga kuri interineti.

Ubu bufatanye bwakozwe mu rwego rwo gufasha abakoresha Airtel Money kwakira amafaranga bohererejwe n’abakoresha WorldRemit baherereye mu bice byose by’Isi ako kanya. Muri ibyo bihugu harimo Leta Zunze Ubumwe z’Amerika, Canada, u Bubiligi, u Bwongereza, Australia, u Bufaransa, Sweden, Norway, u Buholandi n’u Budage.

Nyuma y’itangizwa ry’ubu bufatanye, abakiriya ba WorldRemit baherereye mu bice byose by’Isi barabasha gusura urubuga rwa WorldRemit, bahitemo Airtel Money bakurikize amabwiriza.

Umuyobozi Mukuru wa Airtel Rwanda, Bwana Amit Chawla, yavuze ko bishimiye gufatanya na WorldRemit mu gufasha abakiriya babo kwakira amafaranga bohererejwe n’inshuti n’imiryango yabo aho iri hose ku Isi.

Yagize ati “Ibi biradufasha muri gahunda yacu yo korohereza abakiriya bacu gukoresha Airtel Money muri gahunda zabo za buri munsi.”

WorldRemit yorohereza abantu batuye mu bihugu bigera kuri 50 mu bice bitandukanye by’isi kohereza amafaranga kuri Airtel Money mu Rwanda.

Icyo umukiriya asabwa ni ukumanura (Download) Application ku buntu cyangwa akiyandikisha ku rubuga bagatangira kohererezanya amafaranga.

Umuyobozi wa WorldRemit mu Rwanda, Carine Umurerwa, yavuze ko bishimiye gufatanya na Airtel Money mu gufasha Abanyarwanda kubona ubufasha bw’amafaranga bagenerwa n’ababo baba mu bihugu byo hanze.

Yagize ati “Ibi bikaba bifite akamaro kanini muri ibi bihe by’ingamba zo kuguma mu rugo. Ubu bufatanye buzadufasha guha abakiriya ubundi buryo bwo guhererekanya amafaranga tunakomeza kubagezaho serivisi zinoze kandi zizewe.”

Airtel Money ifasha abakiriya bayo kohererezanya amafaranga haba mu gihugu cyangwa hanze y’igihugu; kwishyura ibintu by’ingenzi, kuzigama amafaranga, kugura ama inite no guhabwa serivisi zitandukanye zirebana n’ubukungu.

WorldRemit ni cyo kigo kiza ku isonga mu kohereza amafaranga menshi kuri telephone z’abantu. Hejuru ya kimwe cya kabiri cy’amafaranga WorldRemit yohereza muri Afurika iyohereza kuri telephone.

Abakoresha Airtel Money baratangira kwakira no kohereza amafaranga biciye kuri WorldRemit.

 

Tanga Igitekerezo ukoresheje Facebook

SHARE