Airtel Rwanda yazaniye abakiriya bayo gahunda nshya bise ‘Mu kazi kose’ aho bazajya bahabwa serivise ku buntu

Sosiyete y’itumanaho ya Airtel Rwanda yongeye kudabagiza abafatabuguzi bayo ibashyiriraho gahunda nshya yiswe ‘Mu Kazi kose’ aho bazajya babasha kohererezanya mafaranga ku buntu ndetse no kwishyura serivisi zitandukanye nta kiguzi basabwe.

Kuri uyu wa Kane tariki 16 Mutarama 2020 nibwo Airtel yatangije ubu bukangurambaga ku mugaragaro mu birori byabereye muri Kigali Convention Centre.

Ibi birori byari byahujwe no kwizihiza imyaka umunani iyi sosiyete imaze ku isoko ry’u Rwanda ndetse banaboneraho gutangaza ko uruhushya Tigo yari ifite rwo gukora rwavanweho kuko bamaze guhuza neza ibi bigo bibiri byabaye kimwe aricyo Airtel Rwanda.

“Mu Kazi Kose” ni gahunda nshya ikubiyemo uburyo bw’ikoranabuhanga buzafasha abafatabuguzi ba Airtel kubyaza umusaruro amahirwe ayirimo nka internet na serivisi z’amajwi.

Umuyobozi ushinzwe Airtel Money, yavuze ko umuntu ushaka koherereza undi amafaranga ari ubuntu, byiyongera ku buryo bufasha umuntu kwishyura serivisi zitandukanye nk’umuriro akoresheje Airtel Money nabyo bikorwa ku buntu kandi bihesha amahirwe ubikoze yo guhabwa inyongera.

Uyu muyobozi yakomeje avuga ko n’iyo ubikuza amafaranga uyakura kuri konti iri muri banki uyashyira kuri Airtel Money nabyo ari ubuntu ndetse no kugura ipaki ya internet bikaba bihesha umukiliya guhabwa inyongera ya 30%.

Mu rwego rwo kumenyekanisha iyi gahunda ku bakiriya ba Airtel bose, hateguwe ibitaramo bizazenguruka igihugu bizitabirwa n’abahanzi batandukanye bayobowe na King James, Bruce Melody na Allioni.

Nyuma y’imyaka ibiri Airtel Rwanda iguze imigabane yose muri Tigo, kuri uyu wa Kane kandi nibwo iyi sosiyete yatangaje ko yamaze guhabwa icyangombwa cya burundu na RURA cyo gukora nka sosiyete imwe ariyo Airtel Rwanda, icyari gifitwe na Tigo kikaba cyahise gikurwaho.

Umuyobozi mukuru wa Airtel Rwanda, Amit Chawla yavuze ko guhuza imiyoboro habamo akazi kenshi mu bijyanye n’amajwi, kohereza amafaranga n’ibindi ariko ubu byamaze guhuzwa ku buryo ubu abakoreshaga 072… na 073… bose bahurijwe ku murongo wa Airtel.

Ati “Guhuza mu buryo butaziguye Airtel na Tigo no gutangiza gahunda yiswe ‘Mu Kazi Kose’, twizeye ko bizateza imbere gahunda yo kwishyura ibicuruzwa na serivisi bitandukanye hifashishijwe ikoranabuhanga.

Minisitiri w’Ikoranabuhanga na Inovasiyo, Ingabire Paula wari umushyitsi mukuru muri ibi birori, yashimye ibikorwa Airtel-Rwanda imaze kugeza ku Banyarwanda birimo kwakira no kohereza amafaranga mu buryo bw’ikoranabuhanga kandi bworoshye.

Ati “Ibyo mukora byose nka Airtel bishingiye ku gufasha umukiliya wanyu, mu buryo bwose; uwo mukiliya wanyu ni umuturage wacu; murumva rero ko dusangiye inyungu kandi ni ryo shingiro ry’ubufatanye hagati ya Airtel na Guverinoma y’u Rwanda.’’

Umuyobozi mukuru wa Airtel Rwanda, Amit Chawla.

Minisitiri w’Ikoranabuhanga na Inovasiyo, Ingabire Paula wari umushyitsi mukuru muri ibi birori.

 

 

Tanga Igitekerezo ukoresheje Facebook

SHARE