Akon yahawe ubutaka agiye kwubakamo umujyi we ‘AKON CITY’ muri Senegal

Umuhanzi w’umunyamerika Aliaune Damala Bouga Time Badara AKON Thiam yatangaje ko umushinga wo kubaka umujyi we muri Senegal aho ababyeyi be bavuka watangiye.

Ku rubuga rwe rwa Twitter, yanditse ko amasezerano yo kubaka Akon City yamaze kumvikanwaho muri Senegal.

Nta makuru menshi yatangajwe ku by’uyu mujyi wavuzwe kuva mu 2018 ubwo uyu mugabo yanavuze iby’ifaranga rye ry’ikoranabuhanga yise Akoin.

Icyo gihe yavuze ko ashaka kubaka “Wakanda mu buzima nyabwo”, aganisha ku butaka bwitwa Wakanda buvugwa muri filimi yitwa Black Panther.

Yabwiye abafana be ko yahawe n’abategetsi ba Senegal ubutaka bungana na Hegitari 800 zo gutangiriraho umushinga we. Akon yijeje ko uyu mujyi uzaba “urengera ibidukikije”.

Kuva mu 2014, Akon yatangije umushinga yise ‘Akon Lighting Africa’ wo kumurikira imihanda hakoreshejwe amashanyarazi akomoka ku mirasire y’izuba.

Ibihugu 14 bya Afurika birimo; Benin, Guinea, Mali, Niger, Rwanda, Senegal, Sierra Leone n’ibindi biri mu bigomba gukorerwamo uyu mushinga.

Mu kwezi kwa cyenda gushize mu mirenge y’icyaro ya Ndego na Rwinkwavu mu Karere ka Kayonza mu burasirazuba bw’u Rwanda hagejejwe ibikorwa bya Akon Lighting Africa.

Igishushanyombonera cya Akon City.

 

Tanga Igitekerezo ukoresheje Facebook

SHARE