Amabwiriza mashya agenga imihango y’ubukwe, harimo n’abageni abantu 10 nibo bemerewe kubutaha, kwiyakira ntibyemewe

Minisiteri y’Ubutegetsi bw’Igihugu, yatangaje amabwiriza mashya agenga imihango y’ubukwe ku cyiciro cy’abantu bemerewe kuyikora ishyiraho umwihariko ko batagomba kurenga icumi kandi bagomba kubanza gupimwa Coronavirus.

Inama y’Abaminisitiri yo ku wa 14 Ukuboza 2020 yashyizeho ingamba nshya zigamije gukumira ubwiyongere bw’icyorezo cya Coronavirus. Muri zo harimo ko ‘amateraniro rusange harimo imihango y’ubukwe, ubusabane n’ibirori bitandukanye byaba ibibera mu ngo cyangwa ahandi hose birabujijwe.’

Minisitiri w’Ubutegetsi w’Igihugu, Prof Shyaka Anastase, yasabye abantu gusubika imihango y’ubukwe bakazayisubukura icyorezo cyatanze agahenge

Nyuma y’iki cyemezo hagiye humvikana inkuru z’abantu basezeranye n’abashyingiwe ariko bigakorwa mu bwiru, binyuranye n’amabwiriza yashyizweho n’inzego z’ubuyobozi. Abasanzwe muri ibi bikorwa barafashwe, barigishwa hanyuma bacibwa amafaranga bararekurwa.

Itangazo rya Minaloc ryo kuri uyu wa 21 Ukuboza 2020, ryashyizweho umukono na Minisitiri, Prof. Shyaka Anastase, rigaragaza ko abavuye mu mahanga bafite gahunda yo gusezerana ari bo bashobora gukomorerwa ariko babanje kugaragaza impamvu zifatika.

Rigira riti “Turabamenyesha ko abantu bavuye mu mahanga bakaba bari mu gihugu bazanwe n’imihango y’ubukwe kubera impamvu zidasanzwe bashobora kwemererwa gusezerana imbere y’amategeko no mu idini/itorero ariko uyu muhango nturenze abantu 10 n’abageni barimo.’’

Abazemererwa gukora iyi mihango bagomba kwipimisha COVID-19 bagahabwa n’ibisubizo bigaragaza ko batarwaye.

Nyuma y’ibi bikorwa bazahita bataha kuko ‘kwiyakira cyangwa ibindi birori nyuma yo gusezerana ntibyemewe.’

Rikomeza riti “Ubusabe bwo kwemererwa gusezerana bushyikirizwa Umuyobozi w’Akarere kandi bukagaragaza ibimenyetso by’ubwihutirwe [pasiporo, viza cyangwa tike y’urugendo n’ibindi.]’’

Abafite ibirori by’ubukwe basabwe kubyimurira ikindi gihe, bakazabikora COVID-19 yaragenje make, abantu badashobora kwanduzanya iki cyorezo giterwa n’agakoko ka Coronavirus.

Abaturarwanda bakomeza kwibutswa ko ari ngombwa kubahiriza amabwiriza yo kwirinda COVID-19 harimo gusiga intera hagati y’umuntu n’undi, kwambara neza agapfukamunwa n’amazuru no gukaraba intoki.

Tanga Igitekerezo ukoresheje Facebook

SHARE