Amafaranga azava mu gitaramo ‘Each One Reach One’ azakoreshwa mu bikorwa byo kurwanya ibiyobyabwenge mu rubyiruko

Kuri iki Cyumweru tariki ya 8 Werurwe 2020 nibwo  mu mujyi wa Kigali hazabera igitaramo gikomeye cyiswe “Each One Reach One”,kizahuriza hamwe ibyamamare muri muzika yo guhimbaza Imana aribo Adrien Misigaro, Gentil Misigaro na Israel Mbonyi.

Iki gitaramo cyateguwe n’umuryango witwa Melody of New Hope yatangijwe n’umwe muri aba bahanzi ariwe Adrien Misigaro, babinyujije mu bukangurambaga bwo gukangurira abantu kureka ibiyobyabwenge bakayoboka inzira y’agakiza by’umwihariko urubyiruko.

Mu kiganiro aba bahanzi bagiranye n’itangazamakuru aho iki gitaramo kizabera i Rusororo ku Intare Arena, Adrien yavuze ko yagize umutima wo gutangiza Melody of New Hope nyuma yuko asuye ikigo ngororamuco cya Iwawa agasanga umubare munini wababaswe n’ibiyobwange bahari ari urubyiruko bagenzi be nibwo yatekereje ikindi yabakorera kitari ibitaramo n’indirimbo gusa.

Yakomeje avuga ko n’ubwo yagize igitekerezo cyo kurwanya ibiyobwenge we atigeze abikoresha ahubwo ari uko yabonye hari benshi byazahaje.

Nubwo kwinjira muri iki gitaramo bizaba ari ukwishyura, Adrien yavuze ko amafaranga azavamo atari ayo bazatwara ahubwo azakomeza gukoreshwa n’uyu muryango (Melody of New Hope) mu bikorwa bitandukanye ugenda utegura hirya no hino mu gihugu bigamije gukangurira urubyiruko kwirinda ibiyobwabwenge no gufasha abazahajwe nabyo.

Yagize ati “Amafaranga tuzishyuza ntabwo ari ay’abahanzi ngo tuzayajyana, hoya.  Melody of New Hope ni umuryango ugitangira rero turifuza gushaka ubushobozi buzatuma ukomeza gukora kandi ibikorwa bigera hose  mu gihugu ”.

Adrien Misigaro n’umuvandimwe we Gentil Misigaro bafatanyije kuyobora uyu muryango, muri iki gitaramo bazacurangirwa n’itsinda ry’Abanyamerika bazanye basanzwe bakorana  umurimo w’Imana muri Canada biyemeje kuza kubashyigikira.

Bashimangiye ko imyiteguro yose y’igitaramo isa n’iyasojwe igisigaye ni uko umunsi ugera ubundi bagataramira abakunzi ba muzika yo kuramya Imana. Bazafatanya n’abandi bahanzi barimo Israel Mbonyi, munyamerika uririmba mu Kinyarwanda Evan Jarrell, Jake, Marina nawe bavanye muri Amerika na Patrick Nkundabose wavuye muri Sueden.

Kwinjira ni  5000 Frw ahasanzwe, 15 000 Frw muri VIP ndetse na 25 000 Frw muri VVIP. Ku bazagura amatike mbere amafaranga yagabanyijwe ku buryo muri VIP ari 10 000 Frw na 20 000 Frw.

Nyuma y’igitaramo kizabera muri Kigali, biteganyijwe ko aba bahanzi bazataramira no muri Auditorium muri Kaminuza y’u Rwanda, Ishami rya Huye ku wa 15 Werurwe 2020.

Adrien,Gentil bari kumwe n’itsinda bazanye mu kiganiro n’abanyamakuru.

 

Tanga Igitekerezo ukoresheje Facebook

SHARE