Amateka y’uwiswe izina ribi Imana ibasha kuyahindukiza akaba uw’umugisha

0

Nyina wa Yabesi yamwise iryo zina kubera “agahinda” kuko yavuze ati: ”Namubyaranye agahinda’’ birashoboka ko hari n’abamukinaga ku mubyimba kubera iri zina, bituma akurana igikomere mu mutima, bimutera kujya imbere y’Imana agira ibyo ayisabira – 1 Ngoma 4:10. Ku Mana byose birashoboka, ishobora guhindura amateka y’umuntu wiswe izina ribi, akamwita irindi zina kandi akabera amahanga yose umugisha.

Hari ubwo ugira ikigeragezo, abantu bose bakabimenya cyangwa imibereho yawe ikaba izwi n’abantu bose, nawe ukumva nta kizagukura muri ako gahinda k’ibyakubayeho, ariko iyo wubaha Imana birashoboka ko yagushumbusha imyaka yawe yariwe n’inzige – Yoweli 2: 25.

Birashoboka ko hari abantu bafite ibikomere by’ibyababayeho, rimwe na rimwe baba bataranagizemo uruhare, bigatuma na bo bitwa ba Yabesi (Gahinda), ariko muri Yesaya 61:7 haravuga ngo “Mu cyimbo cyo gukorwa n’isoni kwanyu, muzagererwa kabiri; mu cyimbo cyo kumwara kwabo, bazishimira umugabane wabo.”

Yabesi amaze kumenya ko hari Imana ishobora guhindura amateka y’umuntu bikaba bishya, ajya kuyishaka yumva ko ibishoboye (kuko hari n’abayisenga bumva ibyababayeho bidashoboka ko bibavaho).

Agahinda yari afite yumvaga nta muntu uwo ari we wese washoboraga kukamumara. Ikibazo ni uko abantu benshi ibibazo byabo babibwira abandi bantu kandi na bo nta cyo babikoraho kuko na bo bafite ibyabo. Nta cyo umuntu yakumarira kuko na we hari igihe aba afite ibikomeye kuruta ibyawe.

Yabesi ageze ku Mana ayisaba ibintu bine:
1. Ayisaba umugisha
2. Ayisaba kumwagurira imbago
3. Ayisaba kumurinda ibyago
4. Ayisaba ko ukuboko kwayo kubana na we.
Bibiliya ivuga ko Imana yamuhaye ibyo yayisabye byose.

Ntibivuga ngo kuba uri umuntu w’Imana utazahura n’ibibazo, ahubwo menya ko kubakunda Imana, byose bifataniriza hamwe kubazanira ibyiza – Abaroma 8:28.

Ibyo byakubayeho Imana izabihindura ubuhamya bukomeye. Nawe Imana izafata ibyo wanyuzemo bibi ivange n’ibya none byiza, bibyare inzagihe nziza yuzuye amashimwe. Yabesi yabayeho yaratereranwe. Wenda hari n’abandi babayeho batyo.

Humura, inzagihe yawe ni nziza, numenya ko Imana ihindura amateka y’umuntu ukabyizera. Abaheburayo 11:1 “Kwizera ni ukumenya rwose ibyiringirwa, udashidikanya ko bitazaba.”

Burya Dawidi yari umunyamugisha, Sawuli ari umutunzi ariko atagira umugisha w’Imana! Tandukanya umugisha n’ubutunzi, bizagufasha kutifuza ibivuye mu butunzi bubi kandi unyurwe n’uko Imana yakugize.

Nshuti mwene data sinzi ibyo wanyuzemo cyangwa ubuzima wabayemo bikaba byaratumye nawe witwa Gahinda, ariko uyu munsi birashoboka ko wahindurirwa izina n’Imana ukitwa Mugisha, Mahirwe, Munezero n’ayandi, mbere ya byose uzirikane iri jambo rivuga ngo: ”Kubaha uwiteka ni bwo bwenge kandi kuva mu byaha ni ko kujijuka” – Yobu 28:28’’

12,077 total views, 1 views today

Comments

comments

ANDIKA ICYO UTEKEREZA KURI IYI NKURU