Search

Amavubi yanyagiwe na Algeria 4-1 mu mukino wanyuma utegura CHAN 2018

IBM Radio Listen Live

KANDA HANO UREBE VIDEO

Kuri uyu wa Gatatu tariki ya 10 Mutarama 2018, nibwo ikipe y’igihugu Amavubi yanyagiwe na Algeria ibitego 4-1 mu mukino wa nyuma wa gicuti muyo Amavubi yagombaga gukina mu mwiherero bamazemo iminsi icumi muri Tunisia wo kwitegura amarushanwa ya CHAN 2018.

Abakinnyi babanje mu kibuga ku ruhande rw’Amavubi.

Uyu mukino wabereye ku kibuga El Menzeh mu murwamukuru i Tunis, warangiye Amavubi y’u Rwanda yeretswe isomo rya ruhago atsindwa ibitego 4 kuri 1 n’ikipe y’igihugu ya Algeria.

Mbere y’umukino umutoza w’Amavubi, Antoine Hey yari yatangaje ko byanze bikunze bagomba kwitwara neza kugira ngo bibongerere icyizere mbere yo kujya muri CHAN izatangira mu mpera z’iki cyumweru.

Hey yabanje mu kibuga abakinnyi yizera cyane ndetse bigaragara ko ari na bo bagize ikipe ya mbere bayobowe na kapiteni Ndayishimiye Eric Bakame mu izamu, byasabye iminota 10 gusa y’umukino kugira Algeria ibone igitego cya mbere cyatsinzwe na Farouk Chafai n’umutwe ku mupira wari uvuye muri koluneri yatewe na Beoussa Mokhtar.

Amavubi yagerageje gusatira izamu rya Algeria maze ku munota wa 16 Biramahire Abeddy atsinda igitego ariko umusifuzi avuga ko yari yaraririye.

Algeria yo itapfushaga ubusa amahirwe, yongeye kugera imbere y’izamu rya Bakame ku munota wa 22 ihita itsinda igitego cya kabiri cyatsinzwe na Abid Mohamed Lamine.

Ikipe ya Algeria nubwo yo nta byinshi yakiniraga kuko nta rushanwa itegura vuba aha, yarushije Amavubi bikomeye ndetse ku munota wa 29 itsinda igitego cya gatatu n’ubundi cya Chafai Farouk wigaragaje cyane muri uyu mukino.

Igice cya mbere cyaje kurangira Amavubi amaze gutsindwa ibitego 3 ku busa, igice cya kabiri kigitangira umutoza Hey yakoze impinduka enye zihuse akuramo Mico Justin aha umwanya Savio Dominique Nshuti, Faustin Usengimana asimbura Manzi Thierry, Ally Niyonzima afata umwanya wa Amran Nshimiyimana na ho Omborenga Fitina asimbura Eric Iradukunda.

Abakinnyi babanjemo ku ruhande rwa Algeria.

Izi mpinduka ariko ntibyabujije Algeria gukomeza kwiharira umukino byanatumye ku munota wa 65 Hey yongera gukora impinduka ebyiri icya rimwe, yinjiza Mubumbyi Barnabé akuramo Biramahire Abeddy na ho Djabel Manishimwe asimbura Yannick Mukunzi.

Ku munota wa 79 Mubumbyi yaje kubonera Amavubi igitego kimwe maze ku munota wa 89 Algeria ibona ikindi gitego cya kane cyatsinzwe na El Habib umukino urangira utyo.

Mu mikino itatu ya gicuti irangiye Amavubi atsinzwe ibitego bitanu, atsinda bibiri, abona n’ikarita imwe itukura. Iyi kipe igomba gutangira CHAN 2018 tariki ya 15 Mutarama ihura na Nigeria ku mukino wa mbere, izakurikizaho Guinée Equatoriale tariki 19, mbere yo kwisobanura na Libya tariki 23 Mutarama 2018.

 

 

Ivan Heritier

Comments

comments




Leave a Reply

Your email address will not be published. Required fields are marked *