Amavubi yatsindiwe muri Mozambique ibitego 2-0

Ikipe y’igihugu Amavubi yatsinzwe umukino ubanza na Mozambique mu mikino yo mu matsinda yo gushaka itike ya CAN 2021 izabera muri Cameroun.

Ni umukino wabereye i Maputo mu murwa mukuru wa Mozambique kuri sitade yabo nkuru Simpeto yakira abantu ibihumbi mirongo ine(40).

Uyu mukino wabanjirijwe n’imvura ikomeye yaguye muri uyu mujyi binatuma abantu batawitabira nk’uko byari byitezwe dore ko igice cya mbere cyose cyakinwe ikiri kugwa.

Ikipe ya Mozambique yakiniraga mu rugo yashoboye yatangiye umukino yotsa igitutu Amavubi maze ku munota wa 25 w’umukino babona penaliti ku mupira wari ukozwe na myugariro w’u Rwanda, Rwatubyaye Abdul uwitwa Edson Andre Stoe ahita ayinjiza neza baba babonye igitego cya mbere.

Bidatinze ku munota wa 27 ba myugariro b’u Rwanda bongeye gukora ikosa maze Francisco Lopez Albino ahagaze neza ahindurira umupira mugenzi we Stanley Ernesto ahita abonezamo igitego cya kabiri.

Mu gice cya kabiri cy’umukino abasore b’Amavubi bagarutse mu mukino batangira guhanahana umupira neza ariko ntibigire icyo bitanga.

Umutoza Mashami Vincent yaje gusimbuza akuramo Muhire Kevin ashyiramo Niyonzima Olivier Sefu naho ku munota wa 70′ akuramo Hakizimana Muhadjili asimbuzwa na Sibomana Patrick(Papy) barakomeza bakina neza ariko ntibyagira icyo bitanga.

Ubwo umukino wari ugeze mu minota yanyuma umuriro waje kubura kuri iyi stade bibangombwa ko umukino uba uhagaze kugeza igihe wongeye kugaruka bakina iminota yari isigaye umukino urangira ari ibitego 2 bya Mozambique kuri 0 y’u Rwanda.

Iritsinda F u Rwanda ruherereyemo riyobowe na Mozambique ifite amanota igakurikirwa na Cap-Vert ndetsena Cameroun zanganyije ubusa ku busa naho ku mwanya wanyuma haza u Rwanda n’amanota zero.

Biteganyijwe ko abankinnyi b’Amavubi bagera i Kigali kuri uyu wa Gatanu aho bafite undi mukino na Cameroun kuri iki Cyumweru tariki ya 17 Ugushyingo 2019 kuri stade ya Kigali i Nyamirambo.

Haruna capiteni w’Amavubi aramukanya n’uwa Mozambique imbere y’abasifuzi bayoboye umukino. Photo: Igihe

 

Tanga Igitekerezo ukoresheje Facebook

SHARE