Ambassade ya RDC yacyuye Abacongomani bari baraheze mu Rwanda kubera Coronavirus

Babifashijwemo na Ambassade ya RD Congo mu Rwanda, Abacongomani bari ku butaka bw’Urwanda guhera ubwo hashyirwagaho itegeko ryo gufunga imipaka kubera icyorezo cya Coronavirus basubiye mu Gihugu cyabo.

N’igikorwa cyabaye kuri icyi cyumweru kuwa 26 Mata 2020 aho Aba Congoman 253 babashije gusubira mu Gihugu cyabo, baje kwiyongeraho abandi benshi batari bari ku rutonde rwa Ambassade bari baraheze mu mujyi wa Gisenyi barabuze uko basubira mu miryango yabo hakurya muri RD Congo.

Umukozi wa Ambassade ya RD Congo yatangarije umunyamakuru wa IBYAMAMARE.COM i Rubavu ko abaturage ba RD Congo bashakiwe uko basubira muri Congo bari mu byiciro bibiri.

“Abari ku rutonde rwa Ambassade ni Aba Congomani bari baje gusura inshuti n’imiryango bakabafungiraho imipaka n’abari banyuze mu Rwanda bavuye mu bindi bihugu hakaba kandi n’Aba Congomani batuye mu mijyi ya Gisenyi na Rusizi basabye ko bashaka kujya mu kazi kabo kugira ngo batazagatakaza ”

Muri aba bari ku rutonde 167 bambukiye kuri Grande Barriére i Gisenyi bajya i Goma muri Kivu ya Ruguru naho 86 bambukira kuri Rusizi I bajya i Bukavu muri Kivu y’epfo.

Ku ruhande rwa DR Congo urwego rw’abinjira n’abasohoka (DGM) rutangaza ko hahawe amahirwe n’abandi baturage ba Congo bari ku butaka bw’Urwanda bifuzaga gutaha n’ubwo batari bari ku rutonde rwatanzwe na Ambassade ya DR Congo mu Rwanda.umubare wabo ukaba wari mwinshi cyane nabo bishimiye kugaruka iwabo nyuma yo kumara igihe batemerewe kwambuka kubera Coronavirus.

Aba batashye muri DR Congo ntibigize bashyirwa mu kato k’iminsi 14 nk’uko byari byatangajwe ahubwo bahise bajya mu miryango yabo dore ko imwe yari yaje kubakira ku mupaka.

Hagati aho hakaba hakiri bamwe mu Banyarwanda baheze mu mujyi wa Goma batangaza ko ubuzima bwabo buri hagati y’umupfu n’umupfumu bagasaba ko bashyirirwaho uko bataha mu Gihugu cyabo kuko iyo bageze ku mupaka ku ruhande rwa RD Congo babirukana bakaba babayeho mu buzima bushaririye kure y’imiryango yabo.

Tanga Igitekerezo ukoresheje Facebook

SHARE