Awilo Longomba waherukaga mu Rwanda mu myaka 25 ishize, yijeje abanya-Kigali igitaramo cy’uburyohe

Umunyabigwi muri muzika ukomaka muri Congo Kinshasa, Awilo Longomba ari kubarizwa mu mujyi wa Kigali aho yatumiwe kuririmba muri gitaramo cya Kigali Jazz Junction kuri uyu wa Gatanu.

Awilo Longomba yageze i Kigali mu rukerera rwo kuri uyu wa Gatatu, aherekejwe n’ikipe y’abantu bazamufasha ku rubyiniro.

Mu gitondo cyo kuri uyu wa Kane tariki ya 24 Ukwakira 2019, uyu muhanzi yakoranye ikiganiro n’itangazamakuru maze avuga ko ashimishijwe no kuba agiye gutaramira abanyarwanda ku nshuro ya mbere. Ati “Mfite abafana benshi mu Rwanda ejo bizanshimisha cyane kuzaba ndi kumwe nabo”.

Yakomeje avuga ko yaherukaga mu Rwanda nko mu myaka 25 ishize ubwo yavugirizaga ingoma umunyabigwi Tshala Muana nawe ukomoka muri Repuburika iharanira demokarasi ya Congo. Icyo gihe ngo bakoze igitaramo i Rubavu n’i Kigali ubu ngo ashimishijwe no kuba agiye gutaramira abanyarwanda ku nshuro ya mbere nka Awilo Longomba.

Awilolongomba yatumiwe muri Kigali Jazz Junction nyuma yuko atowe n’abakurikira urubuga rwa Twitter rwa kompanyi ya RG itegura ibi bitaramo ngaruka kwezi, bamuhisemo ahigitse abandi nka Suzanna Owíyo wo muri Kenya na Mýa wo muri Leta Zunze Ubumwe za Amerika.

Muri iki gitaramo kizaba kuri uyu wa 25 Ukwakira 2019 ahazwi nka Camp Kigali, Awilo Longomba azafatanya n’abandi bahanzi ba hano mu Rwanda nka Mani Martin, Ange Rita Kagaju, Neptunes Band na Nep Djs.

Kwinjira ni 10 000 Frw mu myanya isanzwe, 20 000 Frw muri VIP , 25 000 frw muri VVIP ndetse na 200 000 ku meza y’abantu umunani.

Abazitabira iki gitaramo bazagabanyirizwa ibiciro by’ingendo mu modoka za VW mu buryo bwo kwirinda gutwara banyoye.

Man Martin ubanza iburyo, Remy uyobora RG Consult, Awilo Longomba wambaye ingofero na Patrick umuyobozi muri Bralirwa.
Nyuma y’ikiganiro n’itangazamakuru bafashe ifoto y’urwibutso.
Awilo Longomba asuhuzanya na Man Martin.

 

Tanga Igitekerezo ukoresheje Facebook

SHARE