Bamporiki Edouard yahaye Perezida Kagame isezerano rikomeye nyuma yuko amuhaye imirimo mishya

Mu ijoro ryo kuri uyu wa Mbere tariki ya 4 Ugushyingo 2019 nibwo Perezida wa Repubulika y’u Rwanda Paul Kagame yakoze impinduka muri Guverinoma no mu ngabo z’igihugu. Mu bahawe imyanya mishya harimo na Edouard Bamporiki wagizwe umunyamabanga wa leta muri minisiteri y’Urubyiruko n’Umuco.

Bamporiki wari usanzwe ari umuyobozi w’Itorero ry’Igihugu yagaragaje ishema atewe n’icyizere yagiriwe na Perezida Kagame akamushinga imirimo mishya.

Mu butumwa yanyujije ku rukuta rwe rwa twitter yagaragaje ko yishimiye uyu mwanya yahawe na Perezida Kagame anamwizeza kuzasohoza neza ubu butumwa ahawe.

Yagize ati Witaba kare ugatumwa kure, watumwa n’umukuru ugashima ushingura ugana iyo utumwe. Ubutumwa mumpaye Nyakubahwa Mutoza w’Ikirenga Paul Kagame nzabusohoza bwemye, nzaharanira kutaruta ubutumwa kuko buruta intumwa. Nzaba Mudahusha ku ruhembe muntumye kurasaniraho. U Rwanda ni rweme.”

Gukora muri Minisiteri ifite Umuco mu nshingano zayo kuri Bamporiki Edouard ni amata abyaye amavuta dore ko asanzwe ari umuhanga mu bijyanye n’amateka y’u Rwanda, guhanga imivugo ndetse no gukina filime.

Iyi minisiteri Bamporiki agiyemo ni nshya kuko yahurijwemo iy’urubyiruko yari isanzwe ikora ukwayo ni y’umuco yari isanzwe ifatanye n’iya siporo.

Mu bandi bayobozi bahawe imyanya mishya muri Guverinoma harimo Dr Vincent Biruta wagizwe Minisitiri w’Ububanyi n’amahanga n’ubutwererane, Generali Patrick Nyamvumba yagizwe Minisitiri w’umutekano w’imbere mu gihugu, Aurore Mimosa Munyangaju agirwa Minisitiri wa Siporo, Dr Jean d’Arc Mujawamariya girwa Minsiitiri w’ibidukikije, Rose Mary agirwa Minisitiri w’urubyiruko n’umuco.

Didieu Shema Maboko wari usanzwe ari umusifuzi mpuzamahanga mu mukino wa Basketball yagize umunyamabanga wa leta muri Minisiteri ya Siporo naho Nyirarukundo Ignatienne agirwa Umunyamabanga wa leta muri Minisiteri y’Ubutegetsi bw’Igihugu ushinzwe imibereho myiza y’abaturage.

Aurore Mimosa Munyangaju wagizwe Minisitiri wa Siporo.
Didier Shema Maboko wari usanzwe ari umusifuzi yagizwe umunyamabanga wa leta muri Minisitire ya Siporo.
General Nyamvumba Patrick yagizwe Minisitiri w’umutekano mu gihugu.

 

 

Tanga Igitekerezo ukoresheje Facebook

SHARE