Barack Obama niwe mugabo wemerwa cyane muri Amerika mu myaka 11 ishize, hari abanyafurika bamufitiye inzika kubera Gaddafi

Barack Hussein Obama, ku itariki 3/11/2008 nibwo byatangajwe ko yatsinze amatora yari ahanganyemo n’umurepubulikani John McCain.

Obama yari abaye Perezida wa mbere w’umwirabura (biciye kuri se ukomoka muri Kenya) utorewe kuyobora Leta zunze ubumwe za Amerika.

Inkuru nziza yatashye muri Afurika, aho bamubonaga nk’umuhungu wabo. Bamwe bari bamwitezeho byinshi mu kugira ibyo aihndura ku iterambere rya Afurika, umugabane wa ba sekuru .

Mu gihe cy’ubutegetsi bwe yasuye ibihugu bya Afurika bikurikira; Misiri, Ethiopia, Ghana, Kenya, Senegal, Tanzania, South Africa.

Kuva mu kwa mbere 2009 yatangira kuyobora Amerika kugeza mu 2017, kuri manda ebyiri yatorewe Abanyafurika muri rusange bashobora kutabona ibikorwa bikomeye yakorewe Afurika nk’uko bamwe bari babyiteze.

Gusa kimwe mu byo azibukirwaho ni gahunda yatangije mu 2014 ya ‘Young African Leaders Initiative’ (YALI) yo guhugura no kwigishiriza muri Amerika urubyiruko rwo muri Afurika yo munsi y’ubutayu bwa Sahara rugaragaza impano y’ubuhanga n’ubuyobozi.

Muri uyu mwaka, biteganyijwe ko urubyiruko nk’uru 700 ruzajya gutyaza ubwenge muri kaminuza zo muri Amerika, iyi gahunda kugeza ubu imaze kujyamo urubyiruko 4,400 ruvuye muri Afurika.

Obama afatwa n’abanyamateka, abahanga muri politiki na rubanda muri rusange nk’umwe mu bategetsi Amerika 10 bakomeye kurusha abandi.

Ubushakashatsi bwa Gallup bwo mu kwezi kwa 12/2018 buvuga ko Obama ariwe mugabo wemerwa cyane muri Amerika mu myaka 11 yari ishize.

Obama ariko azakomeza kwibuka n’abanyafurika, n’abanyalibiya by’umwihariko nk’uwatembagaje ubutegetsi bwa Muammar al-Gaddafi wayoboraga kimwe mu bihugu bikomeye bya Afurika ubu byahindutse isibaniro ry’intambara zidashira….

Tanga Igitekerezo ukoresheje Facebook

SHARE