Byumvuhore, Impara na Mavenge banyuze abitabiriye igitaramo cyo kwizihiza yubile y’imyaka 100 ya Padiri Frainpont

Mu ijoro ryo kuri uyu wa 31 Kanama 2019 nibwo mu mujyi wa Kigali habereye igitaramo cyari gitegerejwe na benshi mu bakunzi bamuzika yo hambere. Byumvuhore Jean Baptiste wari umuhanzi w’Imena muri iki gitaramo kimwe na bagenzi be bafatanyije bakoze ku mitima ya benshi ari nako bibuka Padiri Frainpont Ndagijimana washinze ikigo cya HVP Gatagara.

Iki gitaramo cyabereye mu mujyi wa Kiagli ahazwi nka KCEV (Camp Kigali), cyari cyitabiriwe ku rwego rwo hejuru, abitabiriye bafatanyaga n’abahanzi kubyina mu ndirimbo zitandukanye bakunze mu bihe byashize.

Buri muhanzi muri batatu bakuru bari batumiwe aribo; Impala, Mavenge na Byumvuhore bahawe umwanya uhagije bataramira abakunzi b’umuziki wabo.

Saa Tatu zibura umunota umwe, nibwo umushyushyarugamba Patrick Habarugira yahamagaye, Byumvuhore ku rubyiniro, abitabiriye bose barahaguruka bamwakirana icyubahiro gikomeye.

Yatangiriye ku ndirimbo yavuze ko akunda cyane yitwa Karoli Nkunda ya Landuard Randerese, akurikizaho indirimbo ze zirimo; Umurage, Aho hantu, yakiriwe bidasanzwe n’abitabiriye igitaramo kuko yaherekejwe n’itorero ribyina Kinyarwanda.

Yakomereje ku zindi zirimo “Naba Namwe”, “Simenye ko Ari Bwo Bwanyuma” yahimbiye Padiri Fraipont Ndagijimana ari nawe wari impamvu y’iki gitaramo.

Byumvuhore wanyuzagamo akaganiriza abantu yavuze ko atari azi ko yaba umuririmbyi uhuruza abantu banganaga n’abari mu gitaramo kuko yatangiye ari umucuranzi.

Byumvuhore yagarutse mu gice cya kabiri maze aririmba izindi ziri mu nkangara y’indirimbo ze 90 amaze gukora. Izi zirimo “Sarigoma”, “Urupfu”, “Bibananiza Iki” yatumye abantu bongera guhaguruka bakabyina barimo Bamporiki Edouard na Minisitiri Diane Gashumba bagiye ku rubyiniro bagacinya akadiho.

Byumvuhore yaherukaga kuririmbira mu Rwanda mu 2015 nabwo hari mu rwego rwo kwibuka Padiri Fraipont Ndagijimana wahinduye ubuzima bwe n’ubw’andi bafite ubumuga barerewe i Gatagara.

Byumvuhore Jean Baptiste atunguka ku rubyiniro.

Mavenge Sudi nawe yasusurukije abakunzi ba muzika ye baranyurwa.
Minisitiri Diane Gashumba yanyuzwe n’umuziki wa byumvuhore.
Umuyobozi w’Itorero ry’Igihugu Bamporiki Edouard yari yizihiwe adicanya akadiho.

Amafoto: Nsanzabera Jean Paul

Tanga Igitekerezo ukoresheje Facebook

SHARE