Chancelière w’u Budage, Angela Merkel, yagiye mu kato

Nyuma yuko umuganga usanzwe uvura Angel Merkel basanze yaranduye Coronavirus, uyu muyobozi nawe yahisemo kwishyira mu kato bitewe nuko kuwa Gatanu bari babonanye yaje kumuvura.

Steffen Seibert usanzwe ari umuvugizi wa Angela Merkel, kuri iki Cyumweru nibwo yatangaje ko umuganga usanzwe uvura Merkel yari yamuhaye urukingo rwo kumurinda indwara zifata imyanya y’ubuhumekero ku wa Gatanu, ariko nyuma uwo muganga akaza gupimwa bagasanga yarafashwe na Coronavirus.

Ibi bikaba aribyo byatumye Merkel ahitamo kwishyira mu kato azamaramo iminsi 14, ngo bazakomeza kumusuzuma umunsi ku wundi bareba ko na we ataba yaranduye kandi ngo imirimo ye azakomeza kuyikorera mu rugo iwe.

Merkel yasabye abaturage b’u Budage kubahiriza intera ya metero imwe n’igice cyangwa ebyiri hagati y’umuntu n’undi, kandi restaurants, inzu zitunganya imisatsi n’izishyira ibishushanyo ku mubiri (tattoo) zifunga mu gihe cy’ibyumweru bibiri.

U Budage ni igihugu cya gatanu mu bimaze kugira abaturage benshi banduye Coronavirus, kibarura 24 873, mu gihe 94 bamaze kwitaba Imana.

Chancelière w’u Budage, Angela Merkel yishyize mu kato kubera Coronavirus.

 

 

Tanga Igitekerezo ukoresheje Facebook

SHARE