Clarisse Karasira yatunguranye atangaza ko yambitswe impeta, ibyo wamenya kumusore bagiye kubana n’igihugu bazahita bajyamo

Ku gicamunsi cyo kuri uyu wa Gatandatu umuhanzikazi Clarisse Karasira yatunguranye atangaza ko yambitswe impeta n’umusore wamutwaye umutima.

Uretse kuvuga ko yemeye kuzamubera umwamikazi Clarisse Karasira ntabwo yigeze avuga uwo mutware we cyangwa se ngo yerekane ifoto ye.

Umutware yansabye ko nazamubera umugabekazi w’ibikomangoma bye! Nashingira he mpakanira iyo Ngabo y’ikirenga?

Clarisse Karasira akundana n’umusore witwa Ifashabayo Sylivain Dejoie akaba asanzwe ari umuyobozi wa kampani ya Clarisse Karasira Ltd.

Urukundo rw’aba bombi ntirwigeze ruvugwa ahantu na hamwe ndetse nabo babigize ibanga rikomeye n’ubwo abantu babo ba hafi bataburaga kugenda babibona.

Bakunze gutemberana ahantu nyaburanga hatandukanye ariko amafoto yabo bari kumwe ntibashobora kuyashyira hanze.

Urukundo rwa Clarisse Karasira na Ifashabayo rwatangiye uyu mukobwa akibarizwa muri label ya BossPapa ndetse ni we wamugiriye inama yo kuvayo kugira ngo bashinge kampani yabo.

Ifashabayo ni we ukoresha imbuga nkoranyambaga zose za Clarisse Karasira ndetse ni na we muntu ushyira igitekerezo bwa mbere ku kintu cyose uyu mukobwa ashyira kuri Twitter.

Imodoka Clarisse Karasira akunze kugaragara atwaye ni iy’uyu musore ndetse bafitanye n’indi mishinga y’ubuhinzi n’ubworozi bahuriyeho nk’abantu bitegura kubana akaramata.

Umusore wegukanye Clarisse Karasira yize muri Ghana no muri Leta Zunze Ubumwe z’Amerika, ni umwe mu bateguraga ibitaramo byiswe Umurage Nyawo byo kwibuka Kamaliza na Minani Rwema.

Uyu musore w’imyaka 27 ni umuhanga cyane, byamufashije kuba umwizerwa mu bantu bakomeye mu gihugu ndetse yagiye aba mu bayobozi ba Diaspora z’ibihugu yabayemo, ibintu byafashije na Clarisse Karasira mu buryo bumwe cyangwa ubundi.

Ubu ni umukozi muri imwe muri banki zikomeye mu Rwanda ndetse hari amakuru avuga ko nyuma y’ubukwe bashobora kuzajya gutura muri Leta Zunze Ubumwe z’Amerika.

Tanga Igitekerezo ukoresheje Facebook

SHARE