Coronavirus yageze mu Rwanda!

Kuri uyu wa gatandatu tariki 14 Werurwe 2020 nibwo Minisiteri y’Ubuzima mu Rwanda yashyize hanze itangazo rivuga ko muri iki gihugu habonetse umuntu wa mbere wanduye icyorezo cya Coronavirus cyiswe COVID-19.

Muri iri tanganzo iyi Minisiteri ivuga ko umuntu wagaragayeho iki cyorezo ari Umuhinde wageze mu Rwanda aturutse i Mumbai mu Buhinde tariki 08 Werurwe 2020. Akigera mu Rwanda, ngo nta bimenyetso yigeze agaragaza

Ku wa gatanu tariki ya 13 Werurwe 2020 nibwo yumvise atameze neza, yijyana kwa muganga akorerwa isuzuma ryihuse, bamusangamo Coronavirus.

Iri tangazo rikomeza rivuga ko uwo Muhinde arimo kuvurwa, kandi ko ameze neza. Ngo yashyizwe ahantu ha wenyine hitaruye abandi barwayi, ibikorwa byo gushakisha abandi bantu bahuye na we bikaba bikomeje.

Abari mu Rwanda bose bagirwa inama yo gukomeza gukurikiza amabwiriza yatanzwe na Minisiteri y’Ubuzima, by’umwihariko bakaraba ibiganza bakoresheje umuti wabugenewe, birinda guterana mu kivunge, kandi batanga amakuru mu gihe cyose babonye umuntu ufite ibimenyetso by’icyo cyorezo, bahamagara ku murongo utishyurwa wa 114.

Ibindi bihugu byo mu Karere bimaze kugerwamo n’iki cyorezo ni Kenya na Repubulika iharanira Demokarasi ya Congo.

Itangazo Minisiteri y’Ubuzima yashyize hanze.

 

 

 

Tanga Igitekerezo ukoresheje Facebook

SHARE