Crezzo G yatanze ubutumwa bwihariye ku Baturage ba Rusizi na Nyamasheke ku kwirinda Coronavirus

“Ibi n’ibihe byo kongera gutekereza no gusubiza ku murongo ibyo dukora nabi, usanga twiruka ku magana tukirengagiza ubuzima kandi burya amagara araseseka ntayorwa” Crezzo G Samuelo

Ayo n’amagambo yatangajwe n’umuhanzi akaba n’umwanditsi w’indirimbo wamamaye mu karere ka Rusizi na Nyamasheke mu ntara y’uburengerazuba aho yagarukaga ku ngamba zafashwe na Leta y’Urwanda mu bijyanye no kwirinda n’ikwirakwiza ry’icyorezo cya Coronavirus cyugarije isi.

Uyu muhanzi uri mu bakunzwe i Rusizi na Nyamasheke mu kiganiro na Ibyamamare.com yavuze ko nk’umuhanzi muri iyi minsi 14 yashyizweho yo kuguma mu rugo yamubereye umwanya wo gutegura ibikorwa bye.

“Nkumuhanzi, ni ibihe ndangwa no kwirirwa mu rugo nkuko biteganywa n’amabwiriza ya Leta, mbona umwanya wo kwandika ibihangano bitandukanye, kwiga, gukora siporo, ndi gukora ubushakashatsi ku iterambere ry’umuziki wanjye n’uwabanyarwanda muri rusange.”

Crezzo G avuga ko ibi bihe ari urugamba rureba buri munyarwanda kugira ngo duhashye Covid-19

“Ndasaba Abanyarwanda bose gukomera no gukomezanya. Ndabasaba kumvira no kubahiriza amabwiriza duhabwa n’inzego bwite za leta zitureberera, zaba izishinzwe ubuzima, iz’umutekano ndetse n’izindi nzego zihariye.”

Uyu muhanzi akomeza asaba Abanyarwanda kugira isuku no kwirinda icyakurura ikwirakwira rya Covid-19.

“Ndasaba Abanyarwanda kumva inama zose zabagirira akamaro harimo nko gukaraba intoki neza n’amazi meza n’isabune, kwirinda gusuhuzanya bakorana mu biganza, kwirinda kuva mu rugo n’ibindi nkuko bitangazwa na leta.”

Hari ubutumwa bwihariye uyu muhanzi yahaye abaturage bo mu karere ka Rusizi na Nyamasheke.

“Ndasaba abaturage ba Rusizi na Nyamasheke kwirinda guca iy’ubusamo (Guca mu mazi) ngo bambukiranye imipaka bajya muri DR Congo mu buryo butemewe kuko byakururira imbanga Nyamwinshi ibyago nabo batiretse. Kubahiriza amabwiriza ni yo nzira yonyine yadufasha kuva muri aya matsa.”

Crezzo G Samuelo akomeza avuga ko hari umusanzu ukomeye w’umuhanzi muri ibi bihe byo guhashya Covid_19

“Umusanzu w’umuhanzi ni ukugira uruhare mu ifashamyumvire n’ihererekanyamakuru hifashishijwe ubuhanzi, Abahanzi ba muzika duhange indirimbo zifasha abantu kwirinda ikwirakwiza rya Korinavirus bubahiriza amabwiriza, abasinema, ikinamico n’urwenya babikore batyo tubashe gutanga umusanzu.”

Akomeza agira ati :

“Abantu b’ ibyamamare bakwiye kuba NKORE NEZA bandebereho bashyira mu bikorwa amabwiriza yatanzwe bityo abafana babo bazabumva kuko babakunda kandi babakurikize. Imbuga nkoranyambaga z’abahanzi b’ibyamamare nazo zikoreshwe mu buryo bwo gushishikariza abanyarwanda muri rusange kubaho barwanya KoronaVirus bubahiriza amabwiriza.”

Yasoje asaba Abanyarwanda bose abakuru n’abato gufatana mu nda muri ibi bihe bikomeye isi yose yugarijwe n’icyorezo cya Coronavirus.

Tanga Igitekerezo ukoresheje Facebook

SHARE