Deborah Masasu umukobwa wa Apotre Masasu yakoze ubukwe (Amafoto)

0
1620

Kuri uyu wa Gatandatu taliki ya 7 Nzeri 2019 nibwo Deborah Masasu umukobwa wa Apotre Masasu yasezeranye n’umukunzi we Musafiri Thacien mu birori bibereye ijisho aho basezeranijwe na Apotre Masasu ubwe.

Deborah na Thacien basezeraniye mu rusengero rwa ERC Masoro kuri uyu wa Gatandatu mu muhango wayobowe na Apotre Masasu Yoshuwa Ndagijimana witabirwa na benshi biganjemo n’abakristo ba Evangelical Restoration church bari banyotewe cyane n’ubukwe bw’umwana w’umushumba wabo Apotre Masasu bakunze kwita ‘Daddy’.

Umutekano wari wakajijwe muri ubu bukwe dore ko babanje kwangira abanyamakuru gufotora, nyuma bakaza kubemerera umuhango ugeze hagati dore ko bari abageni bamaze kwambikana impeta. Akandi gashya kabereye muri ubu bukwe ni uko Pastor Lydia Masasu umubyeyi wa Deborah Masasu yakoze mu nganzo aririmbira abageni.

Abakristo n’abandi batashye ubu bukwe bahise bahaguruka bakoma amashyi menshi bavuza akaruru k’ibyishimo bacinya umudiho. Ubukwe bwa Deborah Masasu bwahuriranye n’itariki yizihizaho umunsi w’amavuko. Ibi byatumye mu muhango wo gusezerana imbere y’Imana, uyu mukobwa atungurwa aririmbirwa indirimbo yo kwizihiza isabukuru, abageni n’abari mu birori bose barizihirwa. Nyuma yo gusezerana imbere y’Imana, Deborah na Thacien barambitsweho ibiganza n’abakozi b’Imana babasabira umugisha uva ku Mana.