Diamond yatumiye Meddy mu gitaramo gikomeye cya Wasafi Festival azahuriramo na Wizkid ndetse na Tiwa Savage

Meddy uri mubahanzi Nyarwanda barajwe inshinga no kwagurira muzika yabo ku rwego mpuzamahanga, yatumiwe na Diamond kuzaririmba mu gitaramo gikomeye ngaruka mwaka gitegurwa na label ya Wasafi kizwi nka ‘Wasafi Festival 2019’.

Kuri uyu wa Kabiri nibwo Wasafi iyobowe na Diamond Platnumz bemeje ko Meddy nawe azaririmba muri iki gitaramo batumiyemo n’abandi bahanzi b’ibyamamare batandukanye.

Mu butumwa Wasafi TV yanditse ku rukuta rwabo rwa Instagram bagize bati “Umuhanzi w’Umunyarwanda wakunzwe mu ndirimbo ‘Slowly’ no mu njyana ya RnB, Meddy azaririmba mu gitaramo cya Wasafi Festival 2019”.

Uretse Meddy iki gitaramo kizaririmbamo abandi bahanzi b’ibyamamare nka Diamond ari nawe nyirukugitegura n’abandi bose babarizwa muri Wasafi ayoboye, Wizkid, Tiwa Savage, Innos B ukomoka muri Congo ndetse n’abakomeye muri Tanzania nka Professor Jay, Ferooz, TID, Z Anto wamamaye muri binti kiziwi, Country Boy n’abandi benshi.

Mu kiganiro Diamond aherutse kugirana n’itangazamakuru yavuze ko yifuzaga ko Alikiba na Harmonize nabo bazagaraga muri iki gitaramo ariko ntibyashobotse bitewe n’impamvu zitandukanye, nka Harmonize ngo azaba nawe afite igitaramo ahandi.

Yanavuze kandi ko 20% y’amafaranga azava muri iki gitaramo azayatanga mu bikorwa byo kuvuza abana bafite ikibazo cy’umutima babarizwa mu kigo Jakaya Kikwete Cardiac Institution.

Iki gitaramo cya Wasafi Festival kizaba kuri uyu wa Gatandatu tariki ya 9 Ugushyingo 2019 mu mujyi wa Dar es Salaam ku kibuga cyahitwa Kijitonyama.

Meddy nyuma yo kuva muri iki gitaramo akazahita ashyira hanze indirimbo nshya yakoranye na Willy Paul uri mu bahanzi baririmba gospel bakomeye muri Kenya.

Meddy azaririmba muri Wasafi Festival 2019.

 

 

 

Tanga Igitekerezo ukoresheje Facebook

SHARE