EAP2020: Bushali na King James bemeje, Knowless biranga, Sunny aratungurana The Ben aririmba abantu bari gutaha

Kuri uyu wa 1 Mutarama mu mujyi wa Kigali habereye igitaramo ngaruka mwaka cya East African Party cyinjije abanyarwanda mu mwaka mushya wa 2020. Iki gitaramo cyaririmbyemo abahanzi 7 b’abanyabigwi hano mu Rwanda bayobowe naThe Ben wari umuhanzi w’Imena.

Igitaramo cya East African Party cyabaga ku nshuro yacyo ya 12, cyari gifite umwihariko w’uko ntamuhanzi wo hanze wagitumiwemo ndetse ikaba ari no ku nshuro ya mbere kibereye muri Kigali Arena.

Iki gitaramo cyari cyitabiriwe ku rwego rwo hejuru nk’uko bisanzwe, cyaririmbyemo The Ben wari umuhanzi w’Imena, Bruce Melody, Riderman, Bushali, Butera Knowless, King James na Andy Bumuntu, bose bakaba bakoze iyo bwabaga ngo bashimishe abakunzi ba muzika bari bitabiriye.

Anita Pendo niwe wari umushyushya rugamba muri iki gitaramo cyanyuzwaga imbona nkubone kuri televiziyo y’igihugu (RBA).

Kigali Arena mbere gato y’igitaramo.

Mu masaha arenga arindwi cyamaze, abahanzi beretswe urukundo mu ndirimbo zabo zitandukanye n’umuziki w’umwimerere bacurangirwaga na Symphony Band gusa ariko hari ababa bigaragaje neza kurusha abandi.

Andy Bumuntu ni we muhanzi wabimburiye abandi kuri stage.  Yaserutse ku rubyiniro abyina indirimbo ze ahera ku ndirimbo ‘Fenty’ aherutse gusohora.

Mbere y’uko aririmba indirimbo ya kabiri yifurije abafana be umwaka mushya muhire nabo baramwikiriza. Indirimbo ‘Mine’ niyo yahise akurikizaho, ayiririmba yicurangira na gitari. Ni imwe mu ndirimbo zamwaguriye igikundiro ndetse yayiririmbye afatanya n’abafana be bamize amagambo ayigize. Yakomereje ku yitwa ‘On Fire’  ‘Appreciate’ n’izindi.

Umuhanzi King James niwe wahise akurikira ku rubyiniro maze igitaramo gihindura isura abyinisha abari aho karahava mu ndirimbo ze zitandukanye. Yahereye ku yitwa ‘Ayo arya ni ayanjye’  umuraperi Bull Dogg aratungurana amusanga ku rubyiniro byongera ibyishimo bya benshi.

Yaririmbye izindi zirimo ‘Ndakwizera’  ‘Parapara’  ‘Ese warikiniraga’, ‘Birandenga’, ‘Icyangombwa’. Yasoreje ku ndirimbo ‘Umuriro watse’, ‘Ganyobwe’, ‘Kuko turi kumwe’, ‘Buhoro buhoro’, ‘Ndagutegereje’. Ntawashidikanya kwemeza ko ari muri babiri ba mbere bigaragaje cyane muri iki gitaramo.

Butera Knowless yahise akurikira King James,abanzirizwa n’itsinda ry’ababyinnyi be. Yahereye ku ndirimbo ‘Blessed’ aherutse gusohora, akomereza kuri ‘Uzagaruke’  ‘Sweet mutima’, Ujya unkumbura’, ‘Day to day’. Yasozaga indirimbo agakomerwa amashyi ariko ubona ko atashoboye kugumisha abantu mu mwuka wo kubyina bari basizwemo na King James.

Yakiriye ku rubyiniro Nel Ngabo bakoranye indirimbo ‘Ntibikabe’ ndetse na Igor Mabano baririmbana indirimbo ‘Darling’ yakoranye na Ben Pol, bose bakaba babana muri label ya Kina Music.

Kigali Arena yari yakubise yuzuye.

Bushali wagaragarijwe urukundo rukomeye muri iki gitaramo niwe wahise akurikira ku rubyiniro, yakiranywe induru n’amashyi y’urufaya.

Yahereye ku ndirimbo ‘Kinyatrap’, ‘Abahungu’ ya Ice nova zihagurutsa n’abari bakicaye. Indirimbo ‘Niyibizi’  ‘Ni tuebue’ na ‘Ku Gasima’ zishimiwe bikomeye muri iki gitaramo bigaragaza urukundo rukomeye afitiwe muri iyi minsi. Ntawashidikanya uvuzeko ariwe wishimiwe cyane kurusha abandi muri iki gitaramo.

Yavuye ku rubyiniro ashima uko yakiriwe avuga ko 2020 ari umwaka w’icyubahiro ku Mana ashima bikomeye Perezida Kagame.

Umuraperi Gatsinzi Emery wiyise Riderman yageze ku rubyiniro afashwa mu miririmbire n’umuraperi Karigombe bakoranye igihe kinini. Yaririmbye zimwe mu ndirimbo ze za kera nka ‘Umwana w’i muhanda’  ‘Umurashi’  ‘Nkwite nde’  ‘Nakoze iki’ n’izindi.

Yasoreje ku ndirimbo ‘Holo’ na ‘Abanyabirori’ asoza abwira abafana be ati ‘Imana ibahe umugisha tuzasubira ubutaha’.

Ahagana saa sita z’ijoro nibwo Bruce Melody yageze ku rubyiniro ahera ku ndirimbo ‘Uzandabure’ ageze kuyitwa ‘Fresh’ ibintu birahinduka benshi barasimbuka bafatanya nawe kwizihirwa n’iki gitaramo.

Yaririmbye kandi indirimbo ‘Kungola’ umuhanzikazi Sunny bayikoranye aratungurana amusanga ku rubyiniro byongerera ibyishimo mubafana maze sukubyina karahava.

Mbere yuko The Ben wari umuhanzi w’Imena ahamagarwa ku rubyiniro, Dj Bissosso yahawe umwanya maze abyinisha imbaga yari yuzuye muri Arena abavangira indirimbo mu buryo bwa gihanga benshi bamukurira ingofero.

The ben yageze ku rubyiniro saa saba zibura, abanzirizwa n’itsinda ry’ababyinnyi barengaga 15. Yaririmbye nyinshi mu ndirimbo ze nka ‘Lose Control’, ‘Ko nahindutse’,  ageze ku yitwa ‘Can’t get enough’ yakoranye na Otile wo muri Kenya afashwa mu mibyinire na Sherrie Silver.

Uyu muhanzi yahamagaye ku rubyiniro Fabien ubana n’ubumuga bwo kutabona maze baririmbana indirimbo baherutse gukorana bikorabenshi ku mutima.

The Ben wari witezwe na benshi yageze ku rubyiniro abantu bananiwe bituma aririmba abarenga 1/3 cyabari muri Arena basohotse n’abasigaye batagifite imbaraga zo kumwikiriza nk’uko bikwiye. Yavuye ku rubyiniro ahagana saa munani z’ijoro.

Ni ubwa kabiri The Ben yari atumiwe mu bitaramo bya East Africa Party bitegurwa na kompanyi ya East African Promoters nk’umuhanzi mukuru, yaherukaga muri 2017 mu cyabereye muri Parking ya Stade Amahoro.

Anita Pendo niwe wari MC muri iki gitaramo.

Andy Bumuntu mu gitaramo cya EAP 2020

Bushali yishimiwe bikomeye muri iki gitaramo.

Bushali na Slum Drip bafunganywe nuko baserutse muri iki gitaramo.

Sunny na Bruce Melody baririmbanye Kungola binyura benshi.

The Ben yaririmbanye na Fabien ubana n’ubumuga bwo kutabona.

 

Tanga Igitekerezo ukoresheje Facebook

SHARE