Evode Uwizeyimana wavuzweho guhutaza umugore hamwe n’umunyamabanga wa leta muri minisiteri y’uburezi Isaac Munyakazi, beguye ku mirimo yabo

Ibiro bya minisitiri w’intebe w’u Rwanda byatangaje ko Evode Uwizeyimana wari umunyamabanga wa leta muri minisiteri y’ubutabera yeguye ku mirimo ye. Heguye kandi n’umunyamabanga wa leta muri minisiteri y’uburezi Isaac Munyakazi.

Ibiro bya Minisitiri w’Intebe byatangaje ko ku mugoroba wo ku wa kane tariki 06 Gashyantare 2020, Minisitiri w’Intebe Dr. Edouard Ngirente yakiriye ubwegure bw’Abanyamabanga ba Leta Evode Uwizeyimana wo muri Minisiteri y’Ubutabera na Dr Isaac Munyakazi wo muri Minisiteri y’Uburezi.

Uwizeyimana Evode

Kwegura kwa Uwizeyimana gukurikiranye n’igitutu cya bamwe mu bakoresha imbuga nkoranyambaga mu Rwanda banenze ihohotera yemeye ko yakoreye umugore ushinzwe umutekano ku nzu iri mujyi wa Kigali.

Bamwe bavugaga ku mbuga nkoranyambaga ko gusaba imbabazi bidahagije, bagasaba ko yegura ku mirimo ye.

Urwego rw’Igihugu rw’Ubugenzacyaha (RIB) ruherutse gutangaza ko rurimo gukora iperereza ku bivugwa kuri Evode Uwizeyimana ushinjwa guhohotera umugore wari mu kazi ko gusaka abinjira mu nyubako ya Grand Pension Plaza.

Kwegura kwa Munyakazi wari ushinzwe amashuri abanza n’ayisumbuye ko kwatunguranye.

Nta mpamvu zatangajwe n’ibiro bya minisitiri w’intebe z’iyegura rya Uwizeyimana cyangwa Isaac Munyakazi.

Dr Munyakazi Isaac mu buriganya

Dr. Munyakazi Isaac akurikiranweho uburiganya mu bizamini bya leta bisoza umwaka wa 2019.

Amakuru yizewe agera kuri IGIHE yemeza ko Munyakazi yagize uruhare mu buriganya bwatumye hari ishuri ryari mu myanya yo hejuru y’ijana mu bizamini bisoza amashuri by’umwaka ushize, arangije arishyira mu myanya 10 ya mbere ku rwego rw’igihugu.

Dr Munyakazi Isaac

Bivugwa ko yabikoze abifashijwemo n’abakozi b’Ikigo cy’Igihugu cy’Uburezi (REB) aho bikekwa ko yahawe ruswa n’umuyobozi w’iryo shuri kugira ngo bikorwe. Gusa andi makuru yemeza ko ibyaha akurikiranyweho bikiri gukorerwa iperereza, nubwo nyir’ubwite yemera ibyo aregwa ndetse akanabisabira imbabazi.

Dr Munyakazi Isaac afite impamyabumenyi ihanitse (Phd) mu micungire y’Uburezi (Education management) mu gihe Uwizeyimana Evode afite impamyabumenyi y’Icyiciro cya Gatatu cya Kaminuza mu bijyanye n’amategeko.

Tanga Igitekerezo ukoresheje Facebook

SHARE