Fresh Gemmy umuhanzi mushya wahiriwe n’umwaka wa 2019

Fresh Gemmy Ni umuhanzi Nyarwanda ukorera muzika muri Leta z’unze ubumwe z’Amerika n’umwe mu mpano nshya ntashidikanywaho wigaragaje mu mwaka wa 2019 mu ndirimbo atangiramo ubutumwa kuri rubanda yitsa ku bakundana cyane.

Muri we ngo akunda cyane abantu, Imana, gusenga, ubuzima budahambaye no kuririmba Imana yamuhayemo impano.

Aririmba injyana ya Afrobeat ariko akaririmbamo ubutumwa bwiza, avuga ko yabihereye ari umwana aririmba muri Korali.

Mu mwaka wa 2019 nibwo abantu batangiye kumumenya binyuze mu ndirimbo ye ya mbere yahereyeho yise ” Mwana wanjye” indirimbo yuje ubutumwa n’impanuro bwa kibyeyi.

Mwana Wanjye by Fresh Gemmy

Indirimbo ze ni nawe uziyandikira.

Ati “Nkunda gukora ibintu byanjye bindimo burya abantu ikibica ni uko bakora ibintu bataremanywe, njye mbikora kuko bindimo si ibyo nshakisha”.

Nyuma ya “Mwana Wanjye” yakiriwe neza n’imihanda yose haba mu Rwanda,muri RD Congo by’umwihariko i Masisi na Rutshuru no muri Diaspora ya kure. uyu munyempano yakurikijeho iyo yise “Urugo Ruhire” indirimbo yatuye abitegura gushinga ingo by’umwihariko akaba yarayituye mukuru we.

Urugo ruhire ya Fresh Gemmy yahogoje abakundana bahamije ku rushinga bakabana akaramata

 

Kuwa 27 Nzeli 2019 uyu muhanzi yashyize hanze indi ndirimbo y’urukundo yise “Your Love”  yakozwe na Producer Iyzo indirimbo iri mu njyana ibyinitse bidashidikanywaho yamwinjije bya nyabyo mu ruhando rwa muzika Nyarwanda. ni indirimbo yumvikanye cyane mw’itangazamakuru ryo mu Rwanda mu biganiro by’imyidagaduro.

Your Love by Fresh Gemmy

 

Kuwa 11 Ukwakira 2019 afatanyije na Rehema bashyize hanze indirimbo yo kuramya no guhimbaza Imana bise “Yobora Intambwe zanjye” nayo yakiriwe neza.

Yobora intambwe zanjye by Rehema ft Fresh Gemmy

 

Kuwa 10 Ugushyingo 2019 uyu muhanzi yisunze umuraperi Mr Kagame basanzwe bari inshuti maze bakora indirimbo bise “Show me love” yatunganyijwe na Producer Evydecks. iyi ndirimbo iri mu njyana ya Afrobeat yumutse iri muzatumye uyu mwaka wa 2019 ubera uburyohe Fresh Gemmy.

Si indirimbo gusa uyu musore yashyize hanze kuko ari mu bahanzi bahataniraga ibihembo bya KIVU AWARDS2019 mu cyiciro cya Best Diaspora Artist n’ubwo bitamuhiriye iki gihembo kikegukanwa n’uwitwa Diyen.

Fresh Gemmy atangaza ko umwaka wa 2020 uzamubera umwaka w’intsinzi ko yiteguye gukora cyane ku buryo izina rye rizagera ku rwego rushimishije.

Mu magambo ye Fresh Gemmy ntahwema gushimira itangazamakuru ryamufashije bikomeye mu mwaka wa 2019 aho abasaba kuzamushyigikira no muri 2020 ndetse akaba anifuriza Noheli nziza n’umwaka mushya muhire abakunzi ba muzika ye muri rusange

Fresh Gemmy wahiriwe n’umwaka wa 2019 mu muziki

Tanga Igitekerezo ukoresheje Facebook

SHARE