Gahunda ya Gerayo Amahoro yatanze umusaruro, impanuka zagabanutseho 17%, Abantu 2597 bafatwa batwaye imodoka basinze muri 2019

Polisi y’u Rwanda yatangaje ishusho y’umutekano waranze umwaka wa 2019, by’umwihariko kumutekano wo mu muhanda bavuga ko impanuka zo mu muhanda zagabanutseho 17% mu gihe abashoferi bagera 309 970 bahawe ibihano muri rusange bitewe n’amakosa atandukanye bakoze mu muhanda.

Ibi Polisi yabitangaje mu kiganiro yagiranye n’itangazamakuru kuri uyu wa Gatanu ku ya 3 Mutarama 2020 ku cyicaro gikuru cyayo mu mujyi wa Kigali.

CP Rafiki Mujiji, uyobora ishami rya Polisi rishinzwe umutekano wo mu muhanda yavuze ko muri rusange ubu umutekano wo mu muhanda uri ku kigero gishimishije kuko n’impanuka zirikugenda zigabanuka.

Avuga ko mu mwaka ushize wa 2019 habaye impanuka 4661 zikaba zaragabanutseho 17% ugereranyije nizabaye mu mwaka wabanje wa 2018, bikaba byaratutse ku ngaba zitandukanye zafashwe na Polisi.

Gahunda ya ‘Gerayo Amahoro’ y’ibyumweru 52 yatangijwe ku wa 19 Gicurasi 2019, yatanze umusaruro ndetse ngo hari icyizere ko izarangira hari ubuzima bwa benshi burengewe bitewe n’ukuntu bahojejeho ijisho kuri ubu bukangurambaga.

Uyu muyobozi yakomeje avuga ko abashoferi bateshutse ku mategeko abagenga mu muhana bagacibwa amande bose hamwe ari 309 970 mu mwaka wose, harimo 2597 bafashwe batwaye banyoye ibisindisha, 12 755 bafashwe barengeje umuvuduko n’abishe utugabanya muvuduko, 30 042 bafashwe batwaye imodoka zitakorewe isukuzuma ry’ibinyabiziga (controle technique) n’abandi bagiye bakora amakosa atandukanye.

Amategeko ateganya ko umuyobozi w’ikinyabiziga ufashwe atwaye yanyoye ibisindisha aba akoze icyaha gihanishwa amande y’ibihumbi 150, 000 Frw no gufungwa iminsi itanu.

Ufashwe yacomokoye akagabanyamuvuduko acibwa amande y’ibihumbi 200Frw mu gihe icyo gikorwa gihuriranye no kuba atwaye yarengeje umuvuduko hiyongeraho ibihumbi 50,000frw by’amande.

CP Rafiki Mujiji, Umuyobozi w’Ishami rishinzwe umutekano wo mu muhanda muri Polisi y’u Rwanda.
Umuvugizi wa Polisi y’u Rwanda, CP John Bosco Kabera.

 

Tanga Igitekerezo ukoresheje Facebook

SHARE