Gahunda ya guma mu rugo yorohejwe, imirimo imwe n’imwe yemerewe gufungura

Inama y’Abaminisitiri idasanzwe yateranye kuri uyu wa Kane tariki 30 Mata 2020 iyobowe na Perezida Paul Kagame, yafatiwemo imyanzuro yo kworoshya gahunda ya #Guma mu rugo. Ibikorwa bya leta n’iby’abikorera, amasoko, hoteli n’amaresitora  ni zimwe muri serivisi zemerewe gusubukura imirimo.

Hari hashize iminsi 40 leta y’u Rwanda ishyizeho ingamba zikomeye zirimo gufunga ibikorwa hafi ya byose mu gihugu hagasigara hakora ibyangombwa gusa nk’amavuriro n’amaguriro y’ibiribwa, ndetse abaturage bose bagasabwa kuguma mu ngo hagamijwe kwirinda ikwirakwira ry’icyorezo cya Coronavirus.

Mu ngamba nshya zemejwe n’Inama y’Abaminisitiri zirimo gukomorera ibikorwa bimwe na bimwe bikongera gusubukura imirimo mu gihe ibindi byakomeje gufungwa. Insengero, Amashuri, abamotari n’ingendo zigana mu ntara biri mu bitemerewe gutangira gufungura.

Itangazo ryashyizweho umukono na Minisitiri w’Intebe, Dr Edouard Ngirente, rivuga ko izi ngamba nshya zizatangira gukurikizwa guhera ku wa Mbere tariki ya 04 Gicurasi kandi zikazamara ibyumweru bibiri.

Aya mabwiriza mashya ashyizweho mu gihe umubare wabamaze kwandura Coronavirus mu Rwanda wageze kuri 243. Abagera ku 104 nibo bamaze kuvurwa bagakira naho abandi 139 nibo bakirwaye, ikaba nta n’umwe irahitana.

Serivisi zemerewe kongera gukora

a. Ibikorwa by’inzego za Leta n’iby’abikorera byemerewe gukora ariko buri rwego rugakoresha abakozi b’ingenzi, abandi bagakomeza gukorera mu ngo bifashishije ikoranabuhanga.

b. Amasoko azafungura ariko hajye hasimburana umubare utarenze 50% by’abacuruzi bemerewe kuyakoreramo.

c. Inganda n’imirimo y’ubwubatsi byemerewe kongera gukora ariko hagakora abakozi b’ingenzi.

d. Hoteli n’amaresitora zemerewe gukora ariko zigafunga saa Moya z’Ijoro

e. Ibikorwa bya Siporo y’umuntu umwe hanze biremewe ariko ahantu hasanzwe hakorerwa siporo n’imyidagaduro hazakomeza gufunga.

f. Gutwara abantu mu buryo rusange cyangwa ibinyabiziga by’abantu ku giti cyabo byemewe gukora hagati mu Ntara.

g. Abatwara za bisi bagomba kugenzura ko abagenzi bahana intera kandi bagatwara gusa abambaye udupfukamunwa.

h. Imihango yo gushyingura igomba kujyamo abantu batarenze 30.

Serivisi zizakomeza gufunga

a. Amashuri azakomeza gufunga kugeza muri Nzeri 2020.

b. Insengero zizakomeza gufunga.

c. Ahantu ho gukorera siporo, imyitozo ngororamubiri n’imyidagaduro hazakomeza gufunga.

d. Ingendo mu modoka rusange n’iz’abantu ku giti cyabo hagati y’Umujyi wa Kigali n’izindi ntara zizakomeza guhagarara.

e. Moto n’amagare ntibyemerewe gutwara abagenzi ariko bishobora gukomeza kwifashishwa mu gutwara ibintu babigeza ku bandi.

f. Imipaka izakomeza gufungwa, kereka ubwikorezi bw’ibicuruzwa (cargo trucks), Abanyarwanda batahuka mu gihugu bemerewe gutaha ariko bagahita bashyirwa mu kato k’iminti 14 ahantu habugenewe.

g. Inama n’amakoraniro rusange birabujijwe.

Ingamba zari zisanzwe zizakomeza kubahirizwa kugeza ku wa Mbere tariki ya 4 Gicurasi 2020 igihe ingamba nshya zizatangira gushyirwa mu bikorwa.

 

Tanga Igitekerezo ukoresheje Facebook

SHARE