Guhererekanya amafaranga ku buntu na Airtel Money byongerewe mu rwego rwo kwirinda ikwirakwira rya Coronavirus

Airtel Rwanda yatangaje ko kuri uyu wa Mbere tariki ya 16 Werurwe 2020 yongereye gahunda yo Koherezanya amafaranga ku buntu ku bakiliya bayo binyuze mu bukangurambaga bise “Mukazi Kose”. Ibi ngo babikoze mu rwego rwo kugabanya ihererekanya ry’amafaranga nka kimwe mu bishobora kongera ikwirakwira rya Coronavirus.

Nyuma y’uko Minisiteri y’Ubuzima itangaje ko icyorezo cya Coronavirus cyagaragaye mu Rwanda mu mpera z’icyumweru gishize, sosiyete y’itumanaho ya Airtel Rwanda yongereye abafatabuguzi bayo by’umwihariko abakoresha Airtel Money gahunda yokohererezanya amafaranga nta kiguzi bakaswe.

Iyi serivisi ushobora kuyikoresha woherereza amafaranga kuri bagenzi bawe, umuryango cyangwa wishyura ibicuruzwa na serivisi nta mafaranga ukaswe kugirango hirindwe Coronavirus ishobora kuzira mu guhererekanya amafaranga.

Umuyobozi mukuru wa Airtel Rwanda, Amit Chawla yagize ati: “Ibyo twiyemeje n’inshingano zacu ku bakiriya bacu no ku bakozi bacu. Dukorana cyane n’itsinda rya Guverinoma rishinzwe gukurikirana no gutanga imyanzuro kuri Coronavirus. Turizera ko ubu bukangurambaga bwo kohererezanya amafaranga ku buntu bugira uruhare runini mu kugabanya ingaruka zo kwandura iki cyorezo biciye mu guhana amafaranga. ”

Kugirango wohereze amafaranga cyangwa wishure serivisi na Airtel Money ukanda * 500# hanyuma ugakurikiza amabwiriza.

Airtel kandi ivuga ko irigukorana n’Ikigo cy’Igihugu Gishinzwe Ubuzima (RBC) ndetse na Guverinoma y’u Rwanda binyuze mu guteza imbere ubukangurambaga no kugeza ubutumwa ku baturage bwo kwirinda. Numero 114 itishyurwa nayo yatanzwe kugirango byoroshye kumenyekanisha ukekwaho iki cyorezo.

Muri ibi byumweru bibiri biri imbere, iyi sosiyete ivuga ko abakiriya bayo bazakomeza kugezwaho amakuru kandi hanagurwe izindi gahunda zoroshya itumanaho.

Umuyobozi mukuru wa Airtel Rwanda, Amit Chawla.

 

Tanga Igitekerezo ukoresheje Facebook

SHARE