Habonetse abandi bantu 9 banduye Coronavirus mu Rwanda, bose hamwe babaye 50

Minisiteri y’Ubuzima yatangaje ko kuri uyu wa kane tariki 26 Werurwe 2020, mu Rwanda hagaragaye abandi bantu icyenda barwaye Coronavirus. Ibi byatumye umubare w’abamaze kwandura iki cyorezo mu Rwanda ugera kuri mirongo itanu (50).

Iyi Minisiteri yatangaje ko muri aba bantu 9, harimo batanu baje mu Rwanda baturutse i Dubai bahita bashyirwa mu kato, umuntu umwe waje aturutse muri Leta Zunze Ubumwe za Amerika nawe ashyirwa mu kato.

Undi muntu umwe yaje aturutse mu Buholandi, bikaba byaratahuwe ko yahuye n’undi urwaye coronavirus mu Rwanda, ahita ashyirwa mu kato. Abantu babiri batahuwe ko bahuye n’abandi barwaye iyi ndwara mu Rwanda, nabo bahita bashyirwa mu kato.

Minisiteri y’Ubuzima yatangaje ko abarwayi bose bavurirwa ahantu habugenewe kandi ko bari koroherwa. Abenshi muri bo “ubu nta bimenyetso bya Coronavirus bagaragaza. Nta n’umwe urembye.”

Abaturarwanda bose barasabwa gukomeza kwitwararika no gukurikiza ingamba zashyizweho na Leta zijyanye no kwirinda ikwirakwira rya COVID-19.

Izingamba harimo Guhagarika ubucuruzi bw’ibikorwa bitari iby’ibanze, Guhagarika ingendo zihuza imijyi n’uturere n’izindi zitari ngombwa no kuva mu rugo nta mpamvu zihutirwa.

Abantu bose bageze mu Rwanda mu byumweru bibiri bishize barasabwa kwishyira mu kato mu gihe cy’iminsi 14 guhera igihe bagereye mu Rwanda.

 

 

Tanga Igitekerezo ukoresheje Facebook

SHARE