Harmonize nyuma yo kuva muri Wasafi yatangije inzu ye ifasha abahanzi

Rajab Abdul Kahali wamamaye mu muziki nka ‘Harmonize’ nyuma yuko yiyomoye kuri Wasafi ya Diamond Platnumz yamufashije kugira izina afite mu muziki, yatangije inzu ye bwite ifasha abahanzi yise ‘Konde Music Worldwide’.

Mu mwaka wa 2015 nibwo Harmonize yinjiye muri WCB Wasafi Record ya Diamond maze bagirana amasezerano y’imyaka 15, kuva ubwo nibwo izina rye ryatangiye kumenyekana muri muzika mu ndirimbo zitandukanye yagiye akora harimo nka “Aiyola”, “Kwangwaru” na “Bado” yafatanyije na Diamond n’izindi.

Muri Kanama uyu mwaka byaje gutangazwa ko Harmonize atakibarizwa muri iyi nzu iyoborwa na Diamond ariko ku mpande zombi birinda gutangaza impamvu yatumye asesa amasezerano bari bafitanye yaburaga imyaka 11 ngo arangire.

Kuri uyu wa Kane ku ya 10 Ukwakira 2019 nibwo Harmonize yatangaje ku mugaragaro ko yashinze inzu ye bwite ifasha abahanzi.

Mu butumwa yanyujije kuri instagram yagaragaje ko yishimiye cyane kuba yatangije iyi nzu yari imaze iminsi ivugwa ariko abantu bashidikanya ku izina ryayo.

Yagize ati “Ni byiza. Muhawe ikaze mu nzu yanjye ifasha abahanzi Konde Boy Worldwide.”

Uyu musore nyuma yo gufungura iyi nzu ifasha abahanzi, biravugwa ko ategerejwe mu Rwanda mu rugendo rwo gushaka uko yarushaho gukorana n’itangazamakuru ryaho no kwamamaza ibihangano bye.

Harmonize umuyobozi wa ‘Konde Music Worldwide’.

 

Tanga Igitekerezo ukoresheje Facebook

SHARE