Healing Worship team yateguye igitaramo cya Noheli bise ‘Christmas celebration live concert’

Healing Worship team yateguye igitaramo cya Noheli bise ‘Christmas celebration live concert’ yatumiye mo abaramyi nka Prosper Nkomezi, Bosco Nshuti, ndetse n’amatsinda nka Alarm na Gisubizo ministries.

Ni igitaramo kigiye kuba ku nshuro ya mbere aho ubuyobozi bw’iri tsinda buvuga ko bifuzako cyaba ngaruka mwaka, mu rwego rwo gufasha abakunzi b’umusaraba kurushaho kuryoherwa n’uyu munsi mukuru.

Biteganijwe ko iki gitaramo kizabera kuri Dove Hotel ku Gisozi, kuri uyu wa gatatu tariki ya 25 Ukuboza 2019 kuva saa cyenda z’amanywa, umunsi abakristo bizihizaho ivuka ry’umwana w’Imana Yesu Kristo.

Healing Worship team yateguye igitaramo cya Noheli bise ‘Christmas celebration live concert’

Healing Worship Team ikunzwe mu ndirimbo zinyuranye zirimo; Nguwe Neza, Icyo Ngusaba, Mwami icyo wavuze, Amba Hafi, Nta Misozi n’izindi.

‘Christmas celebration live concert’ iteguwe mu gihe cy’iminsi micye ishize iri tsinda rikubutse mu gihugu cya Kenya aho bakoreye igitaramo cy’imbaturamugabo.

Healing Worship Team izaba iri kumwe na Prosper Nkomezi, Bosco Nshuti, Alarm Ministries, Gisubizo Ministries na Pastor Aaron Ruhimbya uyobora Evangelical Restoration church Kimisagara ari na we uzigisha ijambo ry’Imana.

Healing Worship Team, mu kiganiro n’abanyamakuru, yatangaje ko yateguye iki gitaramo mu rwego rwo kwifatanya n’abakristo kwizihiza ivuka rya Yesu Kristo.

Kugura itike yo kwinjira muri iki gitaramo mbere y’uko kiba, mu myanya isanzwe ni 3,000Frw, naho mu myanya y’icyubahiro (VIP) yaba kuyigura mbere y’igitaramo ndetse no kuyigura ku munsi y’igitaramo, ni 10,000Frw bakanaguhamo impano ya interineti yihuta (4G) y’ukwezi.

Uhagarariye Mango asobanura ibyo bafitiye abazitabira iki gitaramo

Iyi internet itangwa na Mango ifite agaciro k’amafaranga y’u Rwanda ibihumbi bitandatu. Ni mu gihe Table yo muri VVIP y’abantu umunani igura 120,000Frw.

Mango nk’umufatanyabikorwa w’imena muri iki gitaramo, yabwiye itangazamakuru ko nubwo bakora ubucuruzi ariko kuri iyi nshuro  bateye inkunga iri tsinda bagamije gufatanya n’abakunzi baryo kwizihiza Noheli.

Mu gihe iki gitaramo cyegereje, amatike ari kuboneka hirya no hino mu mujyi wa Kigali kubashaka kuzitabira iki gitaramo nka Zion Temple Gatenga, Calvary Ministry-Remera, Fousquare Gospel church Kimironko, ERC Kimisagara, ERC Masoro.

Si aho gusa kuko wanayasanga kuri Power of Prayer church Kabeza, Bethesda holy church Gisozi, Camellia Coffe Chic, Camellia Coffe Kisimenti, Camellia Coffe UTC, T2000 Supermarket Mango shop, 4G Square Pension Plaza, Mango 4G KCT shop na Mango 4G Remera Corner.

Diane yiteguye kubaririmbira indirimbo zabo zakunzwe harimo n’inshya
Abaririmbyi ba Healing Worship team imyiteguro barayisoje, igisigaye ni ugutarama

Tanga Igitekerezo ukoresheje Facebook

SHARE