Hon Bamporiki Edouard yemereye abahanzi ubufasha mu bitaramo byose bategura

Muri izi mpera z’icyumweru dusoje ubwo Hon Bamporiki Edouard yari yitabiriye igitaramo cyo kumurika album ya Social Mula, yatangaje ko binyuze muri Minisiteri y’Urubyiruko n’Umuco ayoboye bazajya bafasha buri muhanzi Nyarwanda uzajya ategura igitaramo.

Igitaramo cyo kumurika album yambere ya Social Mula cyabaye kuri uyu wa Gatandatu kuya 23 Ugushyingo 2019, kibera mu mahema ya Camp Kigali.

Mu mbaga yari yitabiriye iki gitaramo harimo n’abayobozi batandukanye nka Bamporiki Edouard Umunyamabanga wa Leta muri Minisiteri y’Urubyiruko n’Umuco,  Visi Perezida wa Sena ushinzwe iby’amategeko no kugenzura ibikorwa bya Guverinoma, Nyirasafari Esperance n’abandi.

Ubwo igitaramo cyari kirimbanyije Bamporiki yaje guhabwa ijambo maze ashimira minisitiri wamubanjirije mu kuyobora iyi minisiteri, agabira Social Mula inka anizeza abahanzi ubufasha mu bitaramo bitandukanye bazategura.

Yagize ati “Iyo uje mu gitaramo cya mbere uba uzajya no mu gitaramo cya nyuma…reka mvuge ibyishimo ntewe no kuba mu gitaramo cy’umuhanga. Ndabanza gushimira Minisitiri twakoreye mu ngata Nyirasafari Esperance urabona ko dukoze ‘hand over’ ya gihanzi. Mwarakoze cyane kuba mugejeje abahanzi aheza akaba ari ho tugiye gukomereza”

Yakuriye ingofero Social Mula amwereka ko yanyuzwe n’imbumbe y’umuziki we amwifuriza gukomeza gutera imbere no gutunga agatunganirwa maze amuha inka.

Ati “Ndifuza kwifuriza umuvandimwe gutunga agatunganirwa kandi n’uwo nzazira mu gitaramo cya nyuma uwo muhigo nzawuhigura kuko ni iby’ingenzi…abakurambera bacu bavuze ko uwo wifuriza gutunga umugabira. Uyu munsi turi kuwa Gatandatu kuwa kabiri Social Mula najya gusura Mama we azasangayo inka nziza.”

Iki nicyo gitaramo cya mbere Bamporiki yari yitabiriye kuva yahabwa inshingano nshya muri Minisiteri y’Urubyiruko n’Umuco.

Ubu bufasha yemereye abahanzi bwakiriwe neza n’abakunzi ba muzika bari aho bose, bitanga icyizere ko ntakabuza umuziki Nyarwanda ugiye kurushaho kuzamuka no kuruhando mpuzamahanga.

Visi Perezida wa Sena ushinzwe iby’amategeko no kugenzura ibikorwa bya Guverinoma, Nyirasafari Esperance.
Social Mula amurikira abakunzi be album ya mbere yise ‘Ma Vie’.

Social Mula ateruye imfura ye.

 

Tanga Igitekerezo ukoresheje Facebook

SHARE