Ibidasanzwe muri Pariki y’akagera imwe muri Pariki zikomeye ku mugabane wa Afurika

  • Pariki y’Igihugu y’Akagera ni imwe muri Pariki ubu zikomeye kuri uyu mugabane wa Afurika.
  • Harimo ubwoko butanu bw’inyamaswa zikomeye zirimo Inkura, Intare, Imbogo, Inzovu n’Ingwe.

Pariki y’Akagera ingana na kilometero kare 1200, ugahera ahitwa Kiyonza mu Murenge wa Mwiri, Akarere ka Kayonza; ugasohokera ahazwi nka Nyungwe ugakomereza ku Cyanyirangegene mu Murenge wa Karangazi muri Nyagatare, bitwara hagati y’amasaha atandatu n’arindwi mu modoka.

Iyi parike ni imirambi

Ni urugendo rw’ibirometero 120 ukora witegereza ibinyabuzima Imana yaremye, hamwe ukisanga utemerewe kuva mu modoka bitewe n’ubukana bw’inyamaswa uhura nazo.

Hari amabwiriza ubanza guhabwa mbere yuko wnjira muri Parike

Harimo kutavugira hejuru, ahubwo ‘ushobora gutangara ariko bikamara amasegonda gusa’ no kutagira icyo ukura muri pariki cyangwa ngo usigemo icyo winjiranye.

Ntiwemerewe kuva mu modoka keretse aho uba ureba ubutaka kubera gutinya inzoka kandi ntiwegere umugina.

Pariki y’Akagera igizwe n’ibiyaga 10 birimo Ihema yakuye izina ku Babiligi bahashinze amahema ubwo bashakishaga isoko ya Nil. Inyamaswa ugenda uzisanga ahantu bitewe n’impamvu eshatu: aho inyamaswa ibonera umutekano, aho ikura ibyo kurya n’ubuhehere buharangwa ikenera.

Urugero niba hari inyamaswa irisha ku biti hejuru, izahitamo kuba ahari ibiti binini. Niba ari indyabyatsi zihitamo kuba ahari ibyatsi bigufi, indyanyama zo zihitamo kuba ahari ibisimba birisha ubwatsi

Inyamaswa zigenda zigira umwihariko utangaje

Uko utembera Pariki y’Igihugu y’Akagera, niko ugenda usobanurirwa buri nyamaswa uhura nayo, haba ibyo ikunda kurya, uko ibaho n’ibyo ikunda kurusha ibindi.

Twiga bita udusambashyamba

Twiga bamwe bita Agasumbashyamba, ‘ingabo ishobora kurya ibiro 65 by’ibyatsi ku munsi, ingore ikarya 56 bitewe n’uko itajya irisha iraramye, ahubwo irisha ibintu biyiri imbere’. Unabasha kumenya uko zigenda zisaza kubera ko iyo zikura uruhu rugenda rwijima.

Inkura nk’inyamaswa iheruka kuzanwa mu Rwanda vuba cyane, yo ngo yiyemera nk’igisimba gifite imbaraga zihagije n’ihembe rikomeye ku buryo nta cyayihangara.

Isatura yo ni inyamaswa ifatwa nk’idatekereza cyane, ku buryo ishobora kumva urusaku rw’imodoka igaturumbuka iyinyura imbere ku buryo yanayigonga.

Iyo myifatire ariko itandukanye cyane n’Inzovu yo igira umutima uzirikana ku buryo bukomeye, ari nayo nyamaswa itajya ipfa kwisukirwa.

Urugero rutangwa ni Inzovu yitwa Mutware yagize igihe cyo kororwa n’Ababiligi bakayimenyereza inzoga, ibisheke, ubugari n’ibindi byose abantu barya, ariko nyuma iza gusubizwa muri Pariki.

Mu gusura Pariki kandi uzamenya ko inyamaswa yitwa Indonyi ifite ububasha bwo kwishariririza mu gihe yikanze bigatuma n’inyamaswa yayica itabasha kuyirya.

Imparage ifite umugeri w’inyuma uremereye, ku buryo n’iyo Intare iyisukiriye ishaka kuyica ikayitera wa mugeri iba itakiharenze.

Imvubu zikunda kuba ziri ahari amazi
Iyi parike irimo ibiyaga bitandukanye
Indonyi
Ibitera nabyo bigaragara cyane muri Parike y’akagera

Tanga Igitekerezo ukoresheje Facebook

SHARE