Ibigo by’abikorera byashyiriweho amarushanwa mu mikino itandukanye hagamijwe kubakundisha gukora sports

Ibigo bitandukanye by’abikorera byashyiriweho amarushanwa yiswe ‘Kigali Corporates Sports Event’ agamije gukangurira abayobozi b’ibi bigo gufasha abakozi babo gukora siporo nka kimwe mu byatuma batanga umusaruro mwinshi. Ibigo bizitabira aya marushanwa bizahatana mu mikino itandukanye nka Football, Basketball no gusiganwa ku maguru.

Aya marushanwa yateguwe na Thousand Hills Event, azaba kuri iki Cyumweru tariki ya 3 Ugushyingo 2019 ku kibuga cya IPRC Kicukiro guhera saa mbiri za mu gitondo.

Mu kiganiro abateguye aya marushanwa bagiranye n’itangazamakuru ku mugoroba wo kuri uyu wa Gatanu, bavuze ko intego y’ayo ari ugukangurira abayobozi b’ibigo by’ingenga gufasha abakozi babo gukora sports kuko ari isoko y’ubuzima bwiza kandi ntiwatanga umusaruro udafite ubuzima buzira umuze.

Nathan Ntaganzwa uyobora Thousand Hills Event yagize ati “Ubundi umukozi ufite ubuzima bwiza niwe utanga umusaruro mwinshi kandi sports igira uruhare runini ku buzima bwiza, niyompamvu twifuje gukangurira ibigo by’abikorera kujya bashakira umwanya abakozi babo bagakorera sports hamwe ndetse bakanarushaho gusabana. Kwirirwa bicaye mu biro gusa ntabwo bihagije.”

Muri iki kiganiro n’itangazamakuru nibwo amakipe y’iyandikishije muri aya marushanwa yahise ashyirwa mu matsinda ndetse ahita atombora uburyo azahura.

Mu mupira w’amaguru amakipe yose yashyizwe mu matsinda abiri.  Mu itsinda rya mbere rigizwe n’amakipe ane, ikipe ya Isango Star yatomboye Igihe Ltd, mu gihe Sulfo Rwanda yatomboye ENOS.

Mu itsinda rya kabiri rigizwe n’amakipe atandatu, ikipe ya Rwandair izaba ihatana na Radisson Blue, undi mukino uzahuza ikipe ya Toyota na Durujuba mu gihe kandi muri iritsinda undi mukino uzahuza StarTimes na Inyange Industries.

Mu mukino wa Basketball hazitabira amakipe abiri ariyo Radisson Blue izacakirana na Rwandair, naho mu gusiganwa ku maguru amarembo azaba afunguye kuri buri wese uzaba atibonye muri iyo mikino yindi yavuzwe.

Aya marushanwa azajya aba ngaruka mwaka, abayitabiriye bazajya banapimwa ku bushake indwara zitandura. Kuri iyi mikino hateguwe abaganga bazaba bafasha abagize ikibazo ndetse n’imbangukira gutabara ishobora kwitabazwa bibaye ngombwa.

Kubijya n’ibihembo Nathan yavuze ko ataribyo bizaba bigenderewe cyane ahubwo ikigenderewe ari uguhuza abantu bakorera ibigo bitandukanye, bagakorerahamwe sports ndetse bakanarushaho kumenyana.

Icyakora ngo ikipe izaba iyambere mu mupira w’amaguru izahabwa igikombe n’amafaranga ibihumbi 100,000Frw naho muri Basketball iyambere ihabwe 50,000Frw.

 

Tanga Igitekerezo ukoresheje Facebook

SHARE