Ibintu 10 bidasanzwe kuri Perezida Robert Mugabe witabye Imana ku myaka 95

0
1810

Perezida Robert Mugabe w’igihugu cya Zimbabwe, ni umwe mu bakuru b’ibihugu babayeho badasanzwe ku isi, haba mu byo yakoze, mu mateka ye, mu mibereho ye, imivugire n’uko yigaragazaga mu ruhando rw’abandi bayobozi.

Robert Mugabe azakomeza kwibukwa na benshi nk’intwari yaharaniye ubwigenge bwa Zimbabwe, azanibukwa kandi nk’umugabo wategetse igihugu kugeza avuze ko azavaho Imana imuhamagaye.

Robert Mugabe yari asigaye agendera mu kagare

Ntibyageze aho ariko kuko yahiritswe ku butegetsi mu 2017. asimburwa na Perezida Mnangagwa, yatangaje ko uruhare rwa Mugabe mu mateka ya Zimbabwe rutazibagirana.

Urupfu rwa Robert Mugabe rwamenyekanye mugitondo cyo kuri uyu wa Gatanu, taliki ya 6 Nzeri 2019 byemezwa na Perezida wa Zimbabwe, Mnangagwa

Iyi nkuru yacu iragaruka ku bintu 10 bidasanzwe byaranze ubuzima bw’umukabwe Robert Mugabe

1. Robert Mugabe niwe mukuru w’igihugu wayoboye akuze kurusha abandi ku isi kandi yateganyaga kongera akiyamamaza.

Perezida Robert Mugabe wa Zimbabwe, niwe mukuru w’igihugu wayoboye akuze kurusha abandi ku isi yose, yavuyeho muri 2017 amaze gutangaza ko mu mwaka wa 2018 azongera akiyamamariza kuyobora iki gihugu. yari amaze imyaka 29 ari Perezida w’iki gihugu, kuko yabaye Perezida mu 1987 ariko na mbere yaho yabanje kuba Minisitiri w’Intebe mu gihe iki gihugu cyari kitarahabwa ubwigenge busesuye.

2. Robert Mugabe afite impamyabumenyi nyinshi ariko hafi ya zose yazikoreye ari muri gereza

Perezida Robert Mugabe, afite impamyabumenyi zirindwi, harimo iyo yakuye muri Kaminuza ya For Hare muri Afrika y’Epfo ari naho Nelson Mandela yize, aha Mugabe akaba yarahakuye impamyabumenyi y’icyiciro cya kabiri cya Kaminuza mu by’ubugeni. Izindi mpamyabumenyi z’ikirenga yagiye azibona yize muri gahunda y’iya kure (Distance Learning), muri izi hakaba harimo izo yigiye ari muri gereza, aho yize ibijyanye n’imitegekere, uburezi, amategeko n’ibindi bitandukanye.

3. Niwe mukuru w’igihugu wabyaye ashaje kurusha abandi

Perezida Robert Mugabe afitanye abana batatu n’umugore we wa kabiri Grace Marufu. Umwana wabo wa gatatu witwa Chatunga, yavutse mu mwaka w’1997, nyuma y’umwaka umwe ababyeyi be bakoze ubukwe. Icyo gihe Perezida Robert Mugabe yari afite imyaka 73 y’amavuko, bivuga ko n’ubukwe bwe n’uyu mugore bwabaye afite imyaka 72 y’amavuko.

4. Perezida Mugabe ahamya ko yazutse kenshi kurusha Yesu Kristu

Perezida Mugabe wagiye anyura mu bihe bikomeye guhera mu bwana bwe, ahamya ko hari igihe cyagiye kigera agapfa ariko nyuma akaza kuzuka. Urubuga rwa Wikileaks rukunda gushyira hanze amabanga y’ibihugu bitandukanye, rwahamije ko uyu musaza yagiye ahangana kenshi na kanseri y’udusabo tw’intanga, ndetse ikaba ijya imuzahaza akajya muri Koma n’ubwo umubiri we ufite ubudahangarwa butuma yongera kumererwa neza abantu ntibabimenye. Ubwo yagiranga imyaka 88, Robert Mugabe mu ijambo yavuze nawe ubwe yarabihamije, aho yagize ati: “Napfuye inshuro nyinshi, aho ninaho naciye kuri Yesu kuko we yapfuye rimwe azuka rimwe ariko njye nagiye mpfa kenshi nkazuka.”

5. Umugore wa Robert Mugabe yabanje kuba umunyamabanga we, aza no kuba ihabara rye

Grace Marufu yahoze ari umunyamabanga wa Perezida Robert Mugabe, ndetse aza no kuba ihabara rye mu ibanga rikomeye, mu gihe undi mugore wa Robert Mugabe yari arembejwe na Kanseri naho undi mugabo w’umupilote wari warashakanye na Grace we yakoreraga hanze ya Zimbabwe, biza kurangira Perezida yegukanye umugore w’abandi. Nyuma umugore wa mbere yaje gupfa, hanyuma Robert Mugabe yishakanira n’uyu wari umunyamabanga be ndetse ahita afata izina rya Grace Mugabe, ninawe babanaga kugeza ubu.

6. Robert Mugabe yafashije umugore we kubona impamyabumenyi y’ikirenga (PHD) mu mezi 2 gusa

Muri Nzeri 2014, Grace Mugabe; umufasha wa Perezida Robert Mugabe, yabonye impamyabumenyi y’ikirenga (PHD) muri Kaminuza ya Zimbabwe, mu gihe yari amaze amezi abiri gusa atangiye kwiga aya masomo. Ibi yabigezeho abishyigikiwemo n’umugabo we akaba na Perezida w’igihugu cya Zimbabwe; Robert Mugabe, kuko uretse kuba Perezida ninawe wabaye umuyobozi w’ikirenga wa Kaminuza ya Zimbabwe. Ibi ntibyavuzweho rumwe, kuko abenshi mu bakurikiraniraga hafi iby’uburezi bavuga ko byatesheje agaciro iyi Kaminuza.

7. Robert Mugabe yashaka guzasimburwa n’umugore we kubutegetsi

Grace Marufu wahawe izina rya Grace Mugabe bamaze gushakana, yagiye azamurwa mu ntera na Robert Mugabe, n’ubwo byagaragaye ko yamuzamuraga cyane kandi mu gihe gito hari ikindi kibyihishe inyuma, kuko yabanje kuba ihabara rye. Kuzamurwa mu ntera nini muri Politiki ya Zimbabwe mu gihe gito, byatumye benshi bavuga ko uyu mugore ari nawe uzamusimbura mu gihe azaba atabarutse. Uyu mugore abibajijwe nawe yagize ati: “Baravuga ngo ndashaka kuzaba Perezida. Nabuzwa n’iki se? Sindi umunya Zimbabwe se?”. 

8. Robert Mugabe yanyazwe impamyabumenyi yari yaragiye ahabwa n’abantu batandukanye

Robert Mugabe agitangira kwinjira muri Politiki, yagiye ashimwa cyane ndetse ahemberwa guharanira uburenganzira bwa muntu, guharanira iterambere, kurwanya inzara n’ibindi. Ibi byatumye ahabwa impamyamumenyi z’icyubahiro (Honorary Degrees) ariko nyuma Kaminuza zitandukanye zagiye zizimuha kimwe n’indi miryango ikomeye, baza kubimunyaga ndetse babitesha agaciro bamushinga guhonyora uburenganzira bw’ikiremwamuntu.

9. Kuri we, abaryamana bahuje igitsina barutwa n’imbwa n’ingurube

Perezida Robert Mugabe, niwe mukuru w’igihugu cyo muri Afrika wagaragaje ko arwanya yivuye inyuma iby’abaryamana bahuje igitsina, ndetse ntawahirahira muri Zimbabwe anagerageza kwerekana ko ari umutinganyi. Mugabe yavuze ko abaryamana bahuje igitsina, kuri we abona barutwa n’imbwa ndetse n’ingurube, bakaba bakwiye guhabwa akato no kwamaganwa.

10. Perezida Robert Mugabe yasabye Barack Obama ko bashyingiranwa bakabana

Perezida Robert Mugabe yasabye Perezida Barack Obama ko bashyingiranwa, ibi akaba yarabivuze nyuma y’uko urukiko rw’ikirenga muri Amerika rwari rwemeye guha uburenganzira abashaka gushyingiranwa bahuje igitsina.

Perezida Mugabe uzwiho kwanga urunuka no kurwanya yivuye inyuma abaryamana bahuje igitsina (abagabo ku bagabo cyangwa abagore ku bagore), yatangarije ibi kuri Radio y’igihugu cya Zimbabwe, maze asobanura impamvu yavuze aya magambo, agira ati: “Nafashe icyemezo nyuma y’uko Perezida Obama yemeye guha uburenganzira abahuje igitsina ngo babe bashyingiranwa, agashyigikira ubutinganyi… Nzajya i Washington mpfukame imbere ya Obama musabe kumbera umugeni.”

Robert Mugabe w’umukiristu avuga ko atiyumvisha uburyo abantu bakora urukozasoni rw’ibyangwa n’amaso y’Imana, bagatatira igihango cya Kristu bakora nk’ibyabaga muri Sodoma. yavuga ko Amerika iyobowe n’abasenga Satani ari nabo bazanira isi umuvumo.

SHARE