Ibyo wakorera umugore wawe igihe atwite bikamwongerera umunezero

Gutwita k’umugore ni igihe kiba kirekire kandi kikarangwamo ibibazo bitandukanye cyane cyane ku bagiye kwibaruka umwana wa mbere.

Iyi niyo mpamvu abahanga mu bijyanye n’imyororokere bagira inama abagabo babo uko bagomba kwitwara kubo bashakanye kuko hari byinshi bihinduka cyane cyane ibyo ugomba kumukorera kugirango bikomeze urukundo rwabo kandi bakomeze kugubwa neza mu rugo rwabo mu cyerekezo cy’iterambere.

Ubushakashatsi bwakozwe ku bijyanye n’inzobere mu bijyanye n’umubano w’abashakanye bwerekanye ko abagore batwite bwa mbere bagira umunezero udasanzwe muri ibyo bihe iyo abagabo babo bababaye hafi. Gusa ushobora kwibaza uti” ni ibihe abagabo babo bagomba kubakorera kugira ngo bigende neza?”

1. Kumufasha imirimo yo mu rugo

Umugore utwite mu mubiri we habamo umusemburo umutera agahinda akumva yifitiye ikizere gike cy’uko ibyo ari gukora bidashobora kurangira neza. Kenshi biragorana ku bagabo guhita bumva iyi ngingo kuko akenshi usanga ariyo bakiva mu busore( ubusilibateri), kandi bamwe bakaba bafata iyi mirimo nk’iyagenewe igitsina gore, ariko iki kikaba aricyo kintu cya mbere gishimisha uwo mwashakanye mu gihe umufashishe kandi bikamurinda umushiha.

2. Kumutega amatwi

Abahanga mu bijyanye n’ubuzima bw’abagore batwite bemeza ko niba hari igihe umugore aba akeneye cyane umuntu wo kumuba hafi ari iki gihe. Kumwumva no kumuha umwanya ni ikintu gikomeye kuri we kuko ngo bimwereka ko uzaba umugabo wo kumuba hafi mu bihe muzahura nabyo bigoye.

3. Kujyana nawe kwa muganga

Kenshi abaganga basaba guherekeza abagore babo kwa muganga mu gihe bagiye kwisuzumisha ndetse no kwivuza, ibi nta yindi mpamvu ibitera nuko aba bombi bahabwa ubutumwa bumwe bw’uko bagomba kwitwara mu gihe umugore atwite. Ibi rero bikaba bishimisha abagore kuko baba bumva bitaweho cyane n’abagabo babo.

4. Kwihangana mu gihe yerekanye impinduka

Abagore bamwe na bamwe mu gihe batwite habaho kuzinukwa ibyo kurya, ibyo kunywa, kuzinukwa abantu babana( ndetse birashoboka ko yazinukwa n’umugabo we). Muri ibyo bihe bigoye rero ngo umugore aba akeneye ko umugabo we yihanganira impinduka kurusha ikindi gihe icyo aricyo cyose yigeze kubaho kuko agira ibibazo birimo no kugira iseseme, gucika intege, kurwaragurika n’ibindi. Ibi byose rero usanga bigora abagabo bamwe kuko benshi bananirwa kwihanganira izo mpinduka ariko ngo iyo umugore afite umugabo wihanganira ibyo byose biramunyura cyane ku kigero utakumva.

5. Kumubwira ko ari mwiza kandi ukamwitaho buri kanya

Abagore benshi mu gihe batwite bagira ibyiyumvo ko ari abantu badashoboye, umubiri wabo uba wataye imiterere karemano(forme normal), kuko bimwe mu bice byabo bikurura abagabo haba habayeho ihindagurika ryabyo . Aha rero niho aba akeneye amagambo meza amuhumuriza umubwira ko ubwiza bwe budashingiye kubibonekera amaso gusa ahubwo buva no ku mutima we ibi biramushimisha cyane bigatuma yiyumvamo icyizere muri we gikomeye umufitiye.
Muri iki gihe cyitoroshye aba akeneye amagambo meza ava mu kanwa k’umugabo we, impano n’ibindi. Ibi bikaba ari urufunguzo rufungura amarembo y’urukundo rw’imitima yabo bombi.

6. Kwihangana

Hari ibintu byinshi bihinduka ku myitwarire y’umugore mu gihe cyose atwite kandi ngo ibi byose bigenda byiyongera uko iminsi igenda yegereza igihe cyo kubyara. Ibi bikaba biri mu bigora abagabo babo kwakira iyo myitwarire ndetse bikaba byateza n’ibibazo hagati yabo, kuko akenshi hari igihe uyu mugore arangwa n’umushiha. Aha abahanga bakaba bagira inama abagabo kubyakira ahubwo bakiga uburyo bagomba kubafata muri ibyo bihe bibagoye.

7. Kumunanurira imitsi( massage)

Ibanga rya mbere ugomba kumenya ni uko abagore bishimira cyane igikorwa cyo kubafasha kunanura ingingo zigize umubiri wabo mu gihe batwite, ibi rero bikaba akarusho k’umugore kubikorerwa n’uwo bashakanye. Gukorera umugore iki gikorwa bikaba bimwongerera umunezero utavugwa.
Aba bahanga kandi bakaba bagira inama abagabo kudafata igikorwa cyo gutwita nk’ikireba umugore gusa, ibi ngo sibyo na gato ahubwo ugomba kumuba hafi kuko aba ari mu bihe nawe afitiye ubwoba kandi agomba kumarwa n’umugabo we.

Tanga Igitekerezo ukoresheje Facebook

SHARE