Ikipe ya Paris Saint Germain nayo yagiranye amasezerano na RDB yo kwamamaza Visit Rwanda

Ikigo cy’Igihugu cy’Iterambere RDB cyatangaje ko nyuma ya Arsenal cyagiranye amasezerano n’ikipe ya Paris St Germain yo kwamamaza gahunda ya Visit Rwanda.

Mu bikubiye muri aya masezerano, harimo kuba ikirango cya Visit Rwanda kizajya kigaragazwa kuri Stade ya Parc des Princes aho PSG yakirira imikino yayo, abakinnyi b’iyi kipe bazajya bambara ikirango cya Visit Rwanda ku mugongo ku myenda bakoresha mu myitozo no mu gihe cyo kwishyushya mbere y’imikino.

Guhera umwaka utaha w’imikino, ubu bufatanye buteganya ko icyayi cy’u Rwanda n’ikawa aribyo byonyine bizajya bitangwa muri stade ya Parc des Princes.

Mu bijyanye no kuzamura impano z’u Rwanda, Paris St Germain izagira uruhare mu kuzamura abakiri bato binyuze mu gushinga ishuri ry’umupira w’amaguru i Kigali, aho iyi kipe izajya itegura imyitozo y’abatoza n’abakiri bato mu kubafasha kugira ubunararibonye bw’iyi kipe ikomeye ku mugabane w’u Burayi.

Biteganyijwe ko kuri uyu wa Gatatu mu mukino uhuza Paris St Germain na Nantes aribwo hatangizwa ubu bufatanye ku mugaragaro.

U Rwanda rugiranye amasezerano y’ubufatanye na PSG nyuma y’ikipe ya Arsenal nayo isanzwe yamamaza Visit Rwanda.

Umuyobozi Mukuru wa RDB, Clare Akamanzi, yatangaje ko amafaranga yashowe muri ubu bufatanye ari igice gito cy’inyungu n’ubusanzwe iva mu bukerarugendo.

Mbappe na Neymar bashobora kugera i Kigali kubera ubu bu ufatanye.

 

Tanga Igitekerezo ukoresheje Facebook

SHARE