Ikipe ya Patriots yari ihagarariye u Rwanda muri Basket, yatanze ibyishimo kubanyarwanda(Amafoto)

Ikipe ya Patriots BBC yo mu Rwanda, yatsinze Gendarmerie National basketball Club (GNBC) yo muri Madagascar amanota 94 kuri 63, ni mu mukino wabaye kuri iki Cyumweru taliki 22 Ukuboza 2019 ubera muri Kigali Arena.

Ni umukino wari uryoheye ijisho

Nyuma yo gutsinda G.N.B.C yo muri Madagascar, Patriots yahise yiyongera ku makipe 11 yamaze kubona itike yo kuzakina imikino yanyuma ya Basketball African League ’BAL’ iteganijwe kuzatangira muri Werurwe 2020.

Patriots yahuriye na Gendarmerie Nationale Basketball Club ’G.N.B.C’ yo muri Madagascar zombi zamaze kubona itike yo gukina imikino ya nyuma ya BAL iyitsinda amanota 94-63 mu mukino warebwe n’umukuru w’igihugu Nyakubahwa Kagame Paul.

Uyu mukino witabiriwe na Nyakubahwa Perezida wa Repubulika y’u Rwanda, Paul Kagame

Patriots yasoje ku mwanya wa mbere nyuma yo gutsinda imikino ya yo yose, ikurikirwa na G.N.B.C yabaye iya kabiri ndetse na Ferroviario de Maputo of Mozambique yabonye umwanya wa Gatatu nyuma yo gutsinda City Oilers yo muri Uganda amanota 74-57.

Amakipe 3 yitwaye neza muri iri tsinda ryakiniraga i Kigali yiyongereye kuyandi makipe 3 yitwaye neza muri Cameroon mu mikino yahabereye mu ntangiriro z’uku kwezi ariyo GSP yo muri Algeria, FAP yo muri Cameroon na AS Police yo muri Mali.

Aya makipe 6 ya mbere muri iyi mikino y’amajonjora kandi yiyongereye ku makipe yo muri Tunisia, Misiri, Angola, Africa y’Epfo, Nigeria na Maroc yose aba 12, akazashyirwa mu matsinda 2, azakine imikino ya nyuma ya Basketball African League izatangira muri Werurwe isozwe muri Nyakanga i Kigali n’ubundi muri Kigali Arena.

Tanga Igitekerezo ukoresheje Facebook

SHARE