Umugabo witwa Simeone Ghirlanda wagize uruhare mu igurishwa rya Rwatubyaye Abdul, aravuga ko agiye kurega ikipe ya Rayon Sports mu Ishyirahamwe ry’Umupira w’Amaguru ku Isi (FIFA) bitewe nuko itubahirije amasezerano bagiranye ubwo yagurishaga uyu mukinnyi muri Sporting Kansas City yo muri Shampiyona ya Amerika.

Simeone Ghirlanda uhagarariye Sosiyete icuruza abakinnyi ya Pan American Calcio, avuga ko mu kugurisha Rwatubyaye yari yemeranyijwe na Rayon Sports ko izamuhamo 10% by’amafaranga yaguzwe ariko kugeza ubu ntana atanu baramuha.

Ngo amaze kwandikira ubuyobozi bw’iyi kipe inshuro nyinshi ariko ntibumusubize, inzira asigaranye n’ukwitabaza FIFA kandi ibi bishobora gutuma Rayon Sports ifatirwa ibihano bikomeye.

Yagize ati “Twumvikanye ko nibabona amafaranga ya Sporting Kansas tariki ya 15
Werurwe 2019 bazanyishyura. Twumvikanye ko nzabonamo 10% ku kazi nakoze, ariko kugeza ubu ntabwo babyubahirijwe kandi niyo mbandikiye ntibasubiza. Hashize ukwezi n’igice, nta kindi nakora kitari ukwitabaza FIFA kugira ngo nishyurwe.”

Rwatubyaye Abdul yerekeje muri Sporting Kansas City aguzwe ibihumbi 50 by’amadolari, Simeone ngo yagombaga guhabwa ibihumbi 5 by’amadorali.

Uyu mugabo yanahishuye ko hari amafaranga y’imishahara y’amezi abiri yanyuma Rayon Sports itarishyura Rwatubyaye ndetse n’andi asaga Miliyoni 2 yasigaye ku yo yahawe ubwo yongeraga amasezerano.

Yakomeje avuga ko yababajwe no gusanga amakipe yo mu Rwanda akora muri ubu buryo nyamara yari yizeye ko ashobora kuhagira imikoranire myiza, akaba yahakura abandi bakinnyi.

Muvunyi Paul, Perezida wa Rayon Sports aganira na Radio 10 yemeye ko batinze kwishyura uyu Simeone Ghirlanda bitewe nuko batari bamenyereye amasezerano nkayo bagurishijeho Rwatubyaye, yizeza ko babikemura.


Rwatubyaye ngo hari amafaranga arenga Miliyoni ebyiri Rayon Sports itaramwishyura.

Tanga igitekerezo

Ntugire ikibazo Email yawe ntabwo tuyigaragaza kurubuga (*).

Ibitekerezo(0)